Alcaraz veldur von­brigðum í Miami annað árið í röð

Alcaraz tapaði 6-3, 5-7, 6-4 fyrir Sebastian Korda, sem situr í 36. sæti heimslistans. Spánverjinn náði að jafna eftir slakt fyrsta sett og setja pressu á Bandaríkjamanninn en þurfti svo að sætta sig við tap.

Alcaraz er ekki vanur því að tapa gegn mótherjum sem eru svona neðarlega á heimslistanum en hann datt líka óvænt úr leik á Miami Open í fyrra, þá gegn David Goffin sem var í 55. sæti heimslistans. Hann segir slakari andstæðinga spila með meira frelsi gegn sér.

„Mér finnst þeir hafa meira að vinna en að tapa í þessum leikjum. Þeir spila pressulausir. Ég reyni að hugsa ekki um pressuna. Finna ekki fyrir henni. Ég reyni að gera mitt besta,“ sagði Alcaraz svekktur.

Spánverjinn byrjaði tímabilið sterkt og fagnaði sigri á Opna ástralska en tapaði svo fyrstu viðureign tímabilsins í undanúrslitum á Indian Wells mótinu gegn Daniel Medvedev.

Bandaríkjamaðurinn Korda var hins vegar kátur, enda aðeins sjötti maðurinn síðan árið 2015 til að vinna efsta mann heimslistans. 

Honum líður líka greinilega vel á heimavelli því hann er á leið í sextán manna úrslit annað árið í röð. Hann komst einnig í sextán manna úrslit árið 2021 en hefur ekki komist lengra á Miami Open.

„Þetta er frábært. Ég fór lengri leiðina, klárlega. Aðeins meira stress en ég hefði viljað, en ég er ánægður með minn leik. Ég hafði trú á sjálfum mér, kom mér í vandræði, en hélt áfram og spilaði á endanum virkilega vel.“