„Mér finnst Salah vera á­hyggju­efni“

Kjartan Henry Finnbogason hefur ákveðna skoðun á stórstjörnu Liverpool sem hefur ekki verið að finna sig í ár eftir að hafa verið besti leikmaður ensku úrvalsdeildarinnar á síðustu leiktíð.

„Mér finnst Salah vera áhyggjuefni,“ sagði Kjartan Henry Finnbogason í Meistaradeildarmörkunum í gær.

„Hann var fínn í pressunni þessar fyrstu mínútur en var svo tekinn út af eftir sextíu mínútur. Þeir voru hættir að gefa á hann,“ sagði Kjartan Henry.

„Maður bara tók eftir því. Það var oft það sem að hann var að fá boltann í fínum stöðum og bara missa hann. Mér finnst bara rosalega dregið af honum á þessu tímabili,“ sagði Kjartan Henry.

„Svo var Florian Wirtz heldur ekki góður í þessum leik. Hann fékk oft góðar stöður en var flögrandi út um allan völl og fór illa með gott færi,“ sagði Kjartan.

Hann hefur samt trú á því að Liverpool fari áfram.

„Þetta var fínn leikur hjá Gala en ég held þetta sé ekki nóg,“ sagði Kjartan Henry eins og sjá má hér fyrir neðan.