Ná­granninn kom út með hnífa í buxna­strengnum

Þetta er á meðal þess sem greint er frá í dagbók lögreglunnar. Nágranninn er sagður hafa verið mjög ölvaður en ekki árásargjarn. Hann mun hafa verið handtekinn með fjölda hnífa á sér og vistaður í fangaklefa.

Atvikið átti sér stað í umdæmi lögreglustöðvar tvö, sem sinnir verkefnum í Garðabæ og Hafnarfirði.

Í miðborg Reykjavíkur var maður handtekinn eftir að hafa ítrekað kastað sér utan í lögreglubíla og verið með óspektir. Hann var sagður mjög ölvaður og vistaður í fangaklefa.

Í umdæmi lögreglustöðvar eitt, sem sér um verkefni í Miðborginni, Vesturbæ, Austurbæ, og á Seltjarnarnesi, var tilkynnt um menn sem stálu slökkvitæki af veitingastað. Þeir höfðu notað það utandyra, en svo skilið það eftir og farið í burtu.

Tilkynnt var um hóp drengja sem köstuðu grjóti í gegnum rúðu í grunnskóla í Reykjavík í umdæmi lögreglustöðvar þrjú, sem sér um mál í Kópavogi og Breiðholti.

Þar var einnig tilkynnt um karl sem fannst utandyra slasaður á fæti og mjöðm. Talið er að hann hafi hrasað niður nærliggjandi tröppur. Hann var fluttur til frekari aðhlynningar á slysadeild.