Gat engu svarað og hótaði að reka að­stoðarfólk sitt

Coventry ræddi við fjölmiðla í aðdraganda lokahátíðar leikanna en var bersýnilega pirruð þegar á henni dundu spurningar sem hún virtist engin svör eiga við, eins og sjá má hér að neðan. Hún gekk svo langt að segja að kannski þyrfti að reka einhvern úr teyminu hennar.

Þetta voru fyrstu Ólympíuleikar Coventry og hún þarf kannski að venjast því að spurningar fjölmiðla geta verið af ýmsum toga.

Ein spurningin snerist um það að talsmaður Þýskalandsforseta hefði sagt að það gæti valdið vandræðum ef Þjóðverjar héldu Ólympíuleikana 2036, þar sem þá væru akkúrat hundrað ár síðan að leikarnir voru haldnir í Berlín á tímum nasista.

Coventry sagðist ekki hafa skoðun á þessu og að hún hefði ekkert heyrt um þetta mál, og að sér væri nú litið til fjölmiðlateymis síns.

Ekki batnaði ástandið þegar Coventry var svo spurð út í stöðuna í Rússlandi, og fréttir um það að núverandi yfirmaður lyfjaeftirlits Rússa hefði tekið virkan þátt í ríkisstýrða lyfjahneykslinu þar í landi.

„Allt í lagi, ég er að horfa á teymið mitt og kannski þarf að segja einhverjum upp því ég var ekki upplýst um þetta heldur, svo…“ svaraði Coventry.

Hún var einnig spurð út í Gianni Infantino, forseta FIFA og meðlim IOC, og þátttöku hans í friðarráði Donalds Trump, og hvort það stangaðist á við reglur um pólitískt hlutleysi IOC-meðlima. Hún kvaðst þá enn ekki þekkja til málsins en sagði þó að meðlimir IOC ættu að gæta hlutleysis.