„Hægt að ná langt með því að vera hress og skemmti­legur“

Þetta voru fyrstu Vetrarólympíu­leikar Jóns Eriks og stóð hans sig frábær­lega. Eftir von­brigði í stór­svigi steig hann upp og hafnaði í 25.sæti í svigi sem er besti árangurs Ís­lendings í greininni í tvo ára­tugi. Frábær reynsla fyrir drenginn 21 árs gamla.

„Ég var náttúru­lega ekki búinn að gera mér grein fyrir því hversu langt var liðið frá því að ein­hver gerði góða hluti en þetta fór bara fram úr væntingum mínum. Ég var ekki að búast við þessu þegar að ég hélt út á leikana, hvað þá að ég fengi að leiða í ein­hvern tíma og þar fram eftir götunum. Þetta er allt svona draumur að verða að veru­leika.“

„Það verður allt ein­hvern veginn auðvelt eftir þessa baráttu í gegnum þetta, að fara á þetta stóra svið. Það verður erfitt að vera stressaður eftir þetta finnst mér.“

Jón vakti at­hygli fyrir jákvætt og skemmti­legt viðhorf á leikunum.

„Það sem ég vil sýna fólki er að það er alveg hægt að ná langt með því að vera hress og skemmti­legur líka. Það má alveg hafa gaman, það þarf ekki að vera leiðin­legt til að ná árangri. Það sem ég hef alltaf gert er að reyna hafa gaman að öllu því sem ég er að gera því ég nenni ekki að gera eitt­hvað ef mér finnst það leiðin­legt. Ég vil mest sýna hvernig ég er og hvað það er gaman að vera í íþróttum. Maður þarf ekki að vera bara í fýlu þegar að það er að ganga vel.“

Hefur aldrei drukkið áfengi

En var Jón væri að skemmta sér of mikið? Hann var virkur á sam­félags­miðlinum TikTok í kringum leikana og birti mynd­band af skemmti­degi sínum með vinum degi áður en hann náði besta árangri ís­lendings í svigi í tvo ára­tugi. Héldu ein­hverjir að drengurinn væri alveg að missa það og töldu hann slompaðan í um­ræddu mynd­bandi. Jón var fljótur að leiðrétta þann mis­skilning.

„Ég hef ekki drukkið áfengi og að ég myndi ekki gera það fyrir keppni og ég var sofnaður fyrir klukkan tíu þetta kvöld. Ég vildi bara sýna að þetta skiptir mig ótrú­lega miklu máli, þetta var ekki bara þannig að ég væri loksins kominn út og væri þá bara drullu­sama, tæki day of fun með strákunum og svo vona það besta. Það var alls ekki þannig.“

Það er alveg hægt að skemmta sér án áfengis?

„Já. Ég hef alla­vegana náð að gera það núna í að verða tuttugu og eitt ár og mun bara halda því áfram.“

En hvað tekur nú við hjá Ís­lendingnum unga?

„Núna taka við enn þá meiri æfingar, við ætlum að fara enn þá lengra. Ég er bara tuttugu og eins árs og ætla mér að fara langt. Mér finnst ég eiga fullt inni og hef skíðað með fullt af þessum gæjum í topp­baráttunni á æfingu. Ég er ekki svona langt frá þeim á æfingum. Ég veit alveg hvað ég get og vil fara að sýna það.“