Selja Ólympíusmokkana á netinu

Í Ólympíuþorpinu í Mílanó kláruðust smokkarnir á nokkrum dögum. Sumir þeirra hafa birst til sölu á markaðstorginu Vinted fyrir háar fjárhæðir.

Þetta kemur fram í frétt ítalska dagblaðsins Corriere della Sera. Þar segir að smokkarnir séu boðnir til sölu á 105,70 evrur stykkið, sem jafngildir rúmum fimmtán þúsund krónum miðað við gengi dagsins í dag.

Þegar hefur verið pöntuð ný sending með fimm þúsund smokkum í þorpið þar sem Ólympíufararnir búa. Fyrr á Ólympíuleikunum var greint frá því að tíu þúsund smokkar sem dreift hafði verið til íþróttafólksins í Cortina d'Ampezzo hefðu verið rifnir út og nú hefur það sama gerst í Mílanó. Tíu þúsund smokkar gufuðu upp á aðeins 72 klukkustundum, teknir af hópi 2.800 íþróttamanna.

Miðað við þessar tölur gæti virst sem íþróttafólkið setji ekki aðeins met í sinni grein, heldur einnig undir sænginni. Þegar betur er að gáð er raunveruleikinn þó annar. Allir smokkarnir sem rifnir voru út á Vetrarólympíuleikunum voru notaðir í upprunalegum tilgangi.

Úthlutun smokka til Ólympíufara er rótgróin hefð sem hófst á Sumarólympíuleikunum í Seúl árið 1988. Markmiðið er að auka vitund um forvarnir gegn kynsjúkdómum. Á Ólympíuleikunum í Ríó voru smokkarnir 450.000, en á Vetrarólympíuleikunum í Sotsjí og Vancouver voru þeir 100.000, á meðan í Pyeongchang voru þeir 110.000.

Það er heldur ekki óþekkt fyrirbæri að íþróttafólk taki smokkana með sér heim sem minjagripi eða jafnvel reyni að selja þá. En skipuleggjendur Ólympíuleikanna á Ítalíu viðurkenna gagnvart Corriere della Sera að eftirspurnin eftir smokkum á vetrarleikunum í ár hafi verið meiri en búist var við.