Fimm sóttir upp á Fjarðar­heiði í nótt

Jón Þór Víglundsson upplýsingafulltrúi hjá Landsbjörg segir að útkallið hafi borist rétt eftir klukkan tvö í nótt. Björgunarsveitarmenn fóru til móts við fólkið á bíl og fundust þau á heiðinni rétt við Heiðarvatn í svokölluðum Mjósundum. Þar höfðu þau fest bíl sinn en fimm voru í hópnum.

Fólkinu var komið til Seyðisfjarðar í skjól en bíllinn var skilinn eftir og verður líklegast sóttur í dag þegar birtir.

Fjarðarheiðin var lokuð í morgun sökum ófærðar en hefur nú verið opnuð en þar er hálka og skafrenningur, samkvæmt upplýsingasíðu Vegagerðarinnar. Þá varar Vegagerðin við því að bíllinn sem fólkið var á í nótt er enn fastur á akrein og því er vegurinn einbreiður á kafla.