Fram­lag Ís­lands mun minna en annarra Norður­landa

Utanríkisráðuneytið tilkynnti í gær um milljarðs króna framlag Íslands til PURL-verkefnis Atlantshafsbandalagsins vegna kaupa á varnartengdum búnaði í Úkraínu.

Pawel Bartoszek, formaður utanríkismálanefndar og þingmaður Viðreisnar, segir það ekki stefnubreytingu af hálfu Íslands að svona hárri upphæð sé varið til vopnakaupa.

„Alls ekki. Þessi stuðningur er náttúrulega að fullu leyti í samræmi við þingsályktunartillöguna sem hefur verið samþykkt á Alþingi með stuðningi allra flokka,“ segir Pawel.

Engin sérstök pressa sé frá Bandaríkjunum hvað þetta varðar.

„Pressan snýst einfaldlega um það að ég tel nauðsynlegt, að gefa Úkraínu færi á því að verja sig til þess að stöðva þessa hægu framrás Rússa sem hefur átt sér stað og er í rauninni það sem tefur fyrir friðarviðræðum vegna þess að á meðan Rússland sér fyrir sér að geta haldið áfram að vinna land, þá hafa þeir ekki áhuga á samningum.“

Meginverkefnið sé að styðja við vini Íslands í Úkraínu sem eigi í sjálfstæðisstríði gegn ólöglegri innrás.

„Þá verður líka kannski að setja þetta í það samhengi að ef við skoðum framlög Norðurlanda. Þá eru framlög hinna Norðurlandanna, per íbúa, margfalt hærri heldur en framlög Íslands. Ég held að framlög Danmerkur,“ segir Pawel.

„Frá upphafi stríðsins séu tífalt hærri heldur en framlög Íslands, þannig að ef eitthvað er, þá mættum við gera betur. Í öllum stuðningi.“

Hann segir að fé sé einnig varið til mannúðarmála og nefnir til dæmis kaup á rafölum þar sem raf- og hitakerfi Úkraínu sé lamað. Árleg öryggisráðstefna fer fram í Munchen í dag sem Þorgerður Katrín Gunnarsdóttir utanríkisráðherra sækir fyrir Íslands hönd. Í aðdraganda ráðstefnunnar sagði Metta Fredriksen forsætisráðherra Danmerkur að allt hnigi í þá átt að Bandaríkin væru á leið frá Evrópu og að álfan þyrfti að vígbúast.

„Ég myndi nú ekki spá því að Bandaríkin myndu hverfa frá Evrópu alfarið. Bandaríkin gegna lykilhlutverki í vörnum Evrópu og munu gera það áfram. Hins vegar, hafa skilaboð frá þessum stjórnvöldum í Bandaríkjunum, og reyndar þeim síðustu, verið þau að Evrópa þurfi að taka meiri þátt í eigin vörnum og það hefur hún verið að gera.“