Vel heppnaðir Stjörnuleikar á Selfossi

Magnús Hlynur Hreiðarsson skrifar 10. febrúar 2026 20:15

Stjörnuleikarnir á Selfossi tókust einstaklega vel um helgina. Magnús Hlynur Hreiðarsson

Stjörnuleikar fóru fram á Selfossi um helgina, sem var íþróttaskemmtun fyrir börn með sér og stuðningsþarfir. Leikarnir tókust einstaklega vel en þeir fóru fram í íþróttahúsi Vallaskóla.

Boðið var upp á kynningu á nokkrum íþróttagreinum á leikunum og svo voru börnin og unglingarnir að prófa sig áfram í ýmsum íþróttagreinum og leika sér saman eða með foreldrum sínum.

„Þetta eru svona leikar, sem við erum að fara með vítt og breitt um landið. Opna íþróttahús á laugardagsmorgnum og leyfa fjölskyldum fatlaðra barna að koma og leika sér,” segir Valdimar Gunnarsson, verkefnisstjóri „Allir með“

„Við leyfum íþróttunum í umhverfinu að koma og kynna sitt starf og síðan fyllum við svolítið upp í með leik og skemmtun, sem við gerum með,” segir Thelma Dögg Grétarsdóttir, tilvonandi verkefnisstjóri „Allir með“.

Valdimar Gunnarsson, verkefnisstjóri „Allir með“ og Thelma Dögg Grétarsdóttir, tilvonandi verkefnisstjóri „Allir með“Magnús Hlynur Hreiðarsson

„Það er bara keila og babidon og blak og krulla og boccia og alls konar kastleikir og bara fyrst og fremst að hafa gaman, þetta snýst um að allir hafi gaman og allir séu með,” segir Ása Björg Þórhallsdóttir, kennari og þjálfari á Selfossi.

„Og það er svo mikilvægt einmitt í verkefninu „Allir með“ að fólk hugsi þá að það megi allir vera með. Þetta er ekki fyrir ákveðna hópa, þú þarft ekki að vera með ákveðna fötlun,” segir Rakel Magnúsdóttir, svæðisfulltrúi íþróttahéraða á Suðurlandi.

Frá hægri, Ása Björg Þórhallsdóttir, kennari og þjálfari, María Sigurjónsdóttir, lyftingakona og Rakel Magnúsdóttir, svæðisfulltrúi íþróttahéraða á Suðurlandi, sem voru allar hæstánægðar með Stjörnuleikana.Magnús Hlynur Hreiðarsson

Stelpurnar voru ánægðar með daginn.

„Við héldum að það myndi bara kannski koma einn, já, þannig að við erum ánægðar með mætinguna,” segir María Sigurjónsdóttir, lyftingakona sem var alsæl með leikana.

Sóli lukkudýr mætti á staðinn og mikið af krökkum fékk mynd af sér með honum.

Valdís Hrönn var líka mjög ánægð með Stjörnuleikana en hún æfir m.a. í íþróttahúsi Vallaskóla.

„Við erum að æfa hérna boccia þannig að það er alltaf hérna mikið fjör og gleði, já og við hvetjum alla til að koma og vera með,” segir Valdís Hrönn.