Birtu ekki baulið

Greint er frá málinu í umfjöllun Guardian. Þar kemur fram að áhorfendur á San Síró leikvellinum hafi fagnað mjög þegar skautadrottningin Erin Jackson leiddi bandaríska hópinn inn á leikvanginn. Þegar myndavélin fór hinsvegar á JD Vance mátti heyra áhorfendur baula.

„Þarna er varaforsetinn JD Vance og eiginkona hans Usha - úps, þetta eru ekki...uuu....það eru margir að baula á hann. Flaut, hróp, eitthvað um klapp,“ sagði lýsandinn á kanadísku sjónvarpsstöðinni CBC þegar myndavélunum var beint á varaforsetann. Atvikinu var deilt á samfélagsmiðlum.

Þá er þess getið að blaðamaður Guardian Sean Ingle hafi einnig orðið þess var að baulað hafi verið á varaforsetann og einnig Christine Brennan blaðamaður USA Today. Á bandarísku sjónvarpsstöðinni NBC mátti hinsvegar ekki heyra neitt baul og lýsendur sögðu einungis að þar væri varaforsetinn á ferðinni. Þá deildi Hvíta húsið klippu af atvikinu en þar mátti einungis heyra klapp.

Þess er getið í umfjöllun miðilsins að þetta sé ekki í fyrsta sinn sem komið er í veg fyrir að bandarískir áhorfendur verði vitni að andstöðu gegn ríkisstjórn landsins. Þannig hafi skipuleggjendur golfmótsins US Open í Bandaríkjunum í september beðið sjónvarpsstöðvar um að sýna ekki viðbrögð gesta við komu Donald Trump Bandaríkjaforseta á golfvöllinn þegar úrslit mótsins fóru fram. Fram kemur í frétt Guardian að Vance hafi ekki verið sá eini sem hafi mætt neikvæðu viðmóti meðal áhorfenda. Einnig hafi verið baulað á fjóra íþróttamenn frá Ísrael.