Nafn­laus á­bending upp­haf skoðunar á starfs­mönnum Bifrastar

Margrét Jónsdóttir Njarðvík, rektor á Bifröst, greinir frá þessu í tölvupósti sem hún sendi starfsmönnum og kennurum skólans í dag. Það kemur í kjölfar þess að Félag akademískra starfsmanna skólans lýsti yfir vantrausti á rektorinn og aðra stjórnendur vegna framgöngu þeirra gegn þremur starfsmönnum í tengslum við ábendingu til siðanefndar innan skólans.

„Hér er um að ræða fyrsta mál sinnar tegundar, þar sem rektor fær ábendingu frá aðila sem nýtur nafnleyndar og viðkomandi felur rektor að taka málið áfram,“ skrifar Margrét í póstinum en hún hefur ekki veitt fjölmiðum viðtöl um deilurnar innan skólans til þessa.

Hún hafi í kjölfarið fundað með deildarforseta viðskiptadeildar og rannsóknarstjóra og falið þeim að kanna hvort ábendingin væri tilhæfulaus. Stjórnendunir hafi unnið sína vinnu að hennar beiðni og af heilindum.

„Fyrir það hafa þau legið undir ámæli opinberlega. Þau hafa virt þagnarskyldu sína og hafa því ekki haft tök á að verja faglegan heiður sinn. Ég hef tekið mjög nærri mér gagnrýnina í þeirra garð fyrir það að sinna starfi sínu,“ segir í bréfi rektorsins.

Starfsmannafélagið hefur sakað stjórnendurna um að hafa byggt ályktanir sínar um hvort að þrír starfsmenn skólans hafi réttilega verið skráðir meðhöfundar að greinum á úttekt gervigreindarforrits.

Kemur ekki sjálf nærri sáttaferlinu

Stjórn Bifrastar er sögð hafa lýst fullum stuðningi við Margréti í tölvupóstinum. Hún hafi jafnframt ákveðið að skipa óháðan utanaðkomandi aðila til að leiða sáttaferli innan skólans og endurheimta traust meðal starfsmanna.

Margrét segist ekki ætla að koma sjálf nálægt því ferli þrátt fyrir að í yfirlýsingu stjórnar hafi sagt að óháði aðilinn ætti að leiða það „ásamt rektor“.

„Það mátti skilja sem svo að rektor, sem er aðili máls, verði í forsvari fyrir þá vinnu. Slíkt er ekki heppilegt og þess í stað vil ég taka þátt með sama hætti og annað starfsfólk. Ég hef því tilkynnt stjórn að ég óski eftir því að sú vinna sem tengist sáttaferlinu verði ekki á mínu forræði, heldur stjórnar.“

Utanaðkomandi aðilinn á að funda með öllum starfsmönnum í fámennum hópum.

„Um ræðir fagfólk sem brátt verður kynnt til leiks. Þau verða kölluð að borðinu til að skapa vettvang fyrir heiðarlegt og opið samtal. Ráðning þessara sáttamiðlara verður á forræði stjórnar og í framhaldi af því verður haldinn starfsmannafundur.“

Bréf rektors heild sinni má lesa hér fyrir neðan:

Kæra samstarfsfólk

Á dögunum fundaði stjórn Háskólans á Bifröst vegna þeirra mála sem hafa verið til umfjöllunar innan skólans og í fjölmiðlum. Líkt og kom fram í yfirlýsingu stjórnar, sem send var á starfsfólk, hefur stjórn ákveðið að skipa óháðan utanaðkomandi aðila til að leiða sáttaferli innan skólans og leitast við að endurheimta traust meðal starfsmanna. Þar var einnig áréttað að stjórn beri fullt traust til rektors. Í yfirlýsingunni kom fram að fyrrgreindur óháður aðili skuli leiða þetta ferli „ásamt rektor“. Það mátti skilja sem svo að rektor, sem er aðili máls, verði í forsvari fyrir þá vinnu. Slíkt er ekki heppilegt og þess í stað vil ég taka þátt með sama hætti og annað starfsfólk. Ég hef því tilkynnt stjórn að ég óski eftir því að sú vinna sem tengist sáttaferlinu verði ekki á mínu forræði, heldur stjórnar.

Hér er um að ræða fyrsta mál sinnar tegundar, þar sem rektor fær ábendingu frá aðila sem nýtur nafnleyndar og viðkomandi felur rektor að taka málið áfram. Rektor fundaði í kjölfarið með deildarforseta viðskiptadeildar og rannsóknarstjóra og fól þeim að kanna hvort um tilhæfulausa ábendingu væri að ræða. Dr. Guðrún Johnsen, deildarforseti viðskiptadeildar og Dr. Kasper Kristensen, rannsóknarstjóri Háskólans á Bifröst, unnu sína vinnu að minni beiðni og af heilindum. Fyrir það hafa þau legið undir ámæli opinberlega. Þau hafa virt þagnarskyldu sína og hafa því ekki haft tök á að verja faglegan heiður sinn. Ég hef tekið mjög nærri mér gagnrýnina í þeirra garð fyrir það að sinna starfi sínu.

Við starfsfólk vil ég segja að stjórnendur eru bundnir þagnarskyldu um málefni einstakra starfsmanna. Það er ekki góður bragur á því að stjórnendur svari gagnrýni starfsfólks í fjölmiðlum, þótt erfitt sé að liggja undir ámælum. Þagnarskyldu stjórnenda er ekki aflétt þó opinber umræða sé skólanum þung. Þegar siðanefnd hefur skilað niðurstöðu getur Háskólinn á Bifröst tjáð sig um það sem þar kemur fram. Þessi hluti málsins hefur verið okkur öllum erfiður en við skiljum öll af hverju stjórnendur tjá sig ekki um málefni einstakra starfsmanna opinberlega.

Að lokum vil ég upplýsa ykkur um að sem hluti af fyrrnefndu sáttaferli,hyggst stjórn ráða utanaðkomandi aðila til að funda með öllum starfsmönnum í fámennum hópum. Um ræðir fagfólk sem brátt verður kynnt til leiks. Þau verða kölluð að borðinu til að skapa vettvang fyrir heiðarlegt og opið samtal. Ráðning þessara sáttamiðlara verður á forræði stjórnar og í framhaldi af því verður haldinn starfsmannafundur.

Með hlýrri kveðju,

Margrét