LIV fær heims­lista­stig þótt mótaröðin upp­fylli ekki skil­yrði

Stjórn Opinbera heimslistans í golfi (OWGR) samþykkti samhljóða umsókn LIV-mótaraðarinnar um að veita henni stig á listann í gær. Mótaröðin hafði barist fyrir því frá stofnun árið 2022 en án árangurs. 

Heimslistinn skiptir atvinnukylfinga sköpum þar sem hann hefur mikið um það að segja hverjir komast inn á risamót golfsins fjögur.

Í ákvörðun sinni viðurkenndi stjórnin að LIV uppfyllti ekki fjölda lykilskilyrða fyrir að fá stig á heimslistann. LIV-mót eru þannig umtalsvert fámennari en flest önnur atvinnumannamót og veikari. Þá er LIV að mestu lokuð mótaröð sem kylfingum er boðin þátttaka á frekar en að hver sem er geti unnið sér sæti á henni í undankeppnum.

Ákvörðunin hefur þegar tekið gildi og fá tíu efstu kylfingar á opnunarmóti LIV í Ríad í Sádi-Arabíu um helgina stig á heimslistann.

Ósáttir við hversu fáir fá stig

Þrátt fyrir þennan sigur telur Scott O'Neill, forstjóri LIV, að mótaröðinni vegið með ákvörðun OWGR-samtakanna. Sérstaklega er hann ósáttur við að aðeins tíu efstu keppendur á LIV-mótum fái stig á heimslistann.

„Engin önnur mótaröð eða keppnisdeild í sögu OWGR hefur sætt slíkum takmörkunum,“ sagði forstjórinn í yfirlýsingu og bendir á að þeir sem lendi í ellefta sæti á LIV-móti séu þannig í sambærilegri stöðu við þann sem lendir í 57. sæti á PGA-móti.

PGA-mót eru engu að síður mun fjölmennari en LIV-mót og meðalstyrkleiki kylfinga á þeim er verulega meiri. Sigurvegarinn á LIV í Ríad fær 23 stig á heimslistann en til samanburðar fær sigurvegarinn á móti PGA-mótaraðarinnar í Phoenix um helgina 57 stig.

Trevor Immelman, formaður OWGR og fyrrverandi Masters-meistari, segir að það hafi verið samtökunum gríðarlega mikilvægt að raða bestu kylfingum heims eins nákvæmlega og hægt væri.

„Mig dreymir um heim í atvinnukeppni karla þar sem allir vinna saman og aðdáendur njóta frábærs golfs um allan heim. Það hefur verið leiðarljós mitt frá því að ég tók við þessu hlutverki,“ segir Immelman við AP-fréttastofuna.

Fjarað undan LIV á síðustu misserum

Sádiarabíski þjóðarsjóðurinn setti LIV-mótaröðina á fót til höfuðst PGA-mótaröðinni árið 2022. Undir stjórn Gregs Norman tókst LIV að lokka nokkra af þekktustu kylfingum heims til sín með boði um gull og græna skóga.

Töluvert hefur fjarað undan LIV á undanförnum misserum. Enginn er sterkustu kylfingum heims hefur gengið til liðs við mótaröðina frá því að Jon Rahm gerði það síðla árs 2023.

Síðasta mánuðinn hafa svo tvær af helstu stjörnum LIV snúið baki við mótaröðinni. Brooks Koepka, margfaldur risamótssigurvegari, hóf leik á PGA-mótaröðinni aftur um síðustu helgi og Patrick Reed, Masterssigurvegarinn frá 2018, snýr aftur í haust eftir að hann endurnýjaði ekki samning sinn við LIV.