Sló sig sjálfur í augað og þurfti að hætta keppni

Atvikið var einkar óheppilegt. Perricard var kominn mjög framarlega á völlinn og ætlaði að setja baksnúning á boltann til að koma honum yfir netið, en missti stjórn á honum og skaut sjálfan sig í augað.

Þessi 22 ára tenniskappi er frægur fyrir ógnarsterka uppgjöf en þegar hann reyndi að halda áfram keppni flaug boltinn nánast upp í stúku. Perricard sá illa og var orðinn ringlaður, eins og sjá má í myndskeiðinu hér fyrir neðan.

Hann ákvað þá að gefa settið frá sér og fá aðhlynningu hjá sjúkraþjálfara en eftir það gat hann ekki haldið áfram og gaf leikinn.

Svona meiðsli, við augað, eru alls ekki algeng í tennis en hafa gerst nokkrum sinnum í gegnum tíðina. Davin Goffin lenti í mjög svipuðu atviki í Rotterdam árið 2018, hann var þá í sjöunda sæti heimslistans og að keppa við Grigor Dimitrov sem var í þriðja sætinu, en gat ekki haldið áfram eftir að hafa slegið boltanum í eigið auga.