Verður elsta skauta­konan á Ólympíu­leikunum í 98 ár

Stellato-Dudek verður um leið elsta konan til að keppa í listskautahlaupi á Ólympíuleikum síðan í St. Moritz 1928, þar sem Ethel Muckelt, sem þá var einnig 42 ára, keppti fyrir hönd Bretlands. Hún verður elsta kanadíska konan til að keppa á vetrarólympíuleikum, fyrir utan krullu, síðan í Garmisch-Partenkirchen 1936.

Stellato-Dudek mun skauta með paraskautafélaga sínum, Maxime Deschamps. Parið vann heimsmeistaramótið í listskautahlaupi 2024 og Fjögurra heimsálfa mótið 2024. Stellato-Dudek hefur unnið til sex verðlauna á ISU Grand Prix-mótaröðinni og er þrefaldur kanadískur meistari í listskautahlaupi. Hún er elsti listskautari til að vinna heimsmeistaratitil í nokkurri grein.

Þrátt fyrir að vera fædd í Park Ridge, Illinois og hafa keppt fyrir Bandaríkin í nokkur ár fékk Stellato-Dudek kanadískan ríkisborgararétt seint á árinu 2024 til að fá tækifæri til að skauta með Deschamps.

Stellato-Dudek verður næstelsti Kanadamaðurinn sem tekur þátt í leikunum í ár. Eini eldri íþróttamaðurinn er krullukappinn Marc Kennedy, sem verður 44 ára daginn fyrir setningarathöfnina.

Næstum áratug upp á dag síðan Deanna Stellato-Dudek dustaði rykið af gömlu listskautunum sínum í kjallara móður sinnar í Chicago til að hefja eina ótrúlegustu endurkomu íþróttasögunnar á síðari árum er kanadíska paraskautakonan nú á barmi þess að keppa á Ólympíuleikum í fyrsta sinn.

„Ég varð að hafa þennan kjark til að trúa því að ég gæti snúið aftur og látið þennan villta og galna draum rætast á hátt sem hafði aldrei verið gert áður,“ sagði Stellato-Dudek í nýjasta þætti hlaðvarpsins á heimasíðu Ólympíuleikanna.

„Þessi saga er miklu stærri en ég,“ útskýrði Stellato-Dudek og rifjaði upp sextán ára hlé sitt eftir að hafa verið ein af fremstu skautakonum í unglingaflokki seint á tíunda áratugnum.

„Hún snýst um allar konur á hvaða aldri sem er sem finnst þær vilja breyta einhverju og gera meira úr sjálfum sér en þær voru og að [ég gaf mér] leyfi til að gera það,“ sagði Stellato-Dudek.