„Keyrðu yfir okkur og við leyfðum því bara að gerast“

„Mér fannst svolítil uppgjöf í þessu hjá okkur, þetta voru bara vonbrigði. Frammistaðan léleg og andleysi í okkur“, sagði Arnar eftir tap liðsins.

Tindastóll tapaði gegn Keflavík í síðustu umferð og talaði Arnar þá um eftir leikinn að liðið hefði ekki verið nógu beitt, byrjað leikinn illa og eftir það elt allan leikinn. Það má segja að það hafi verið svipað uppi á teningnum í kvöld.

„Þetta var í raun og veru framhald af frammistöðunni gegn Keflavík, Stjarnan gekk á lagið og keyrðu yfir okkur og við leyfðum því bara að gerast.“

Félagaskiptaglugginn lokar annað kvöld á miðnætti og það er spurning hvort Tindastóll muni gera einhverjar breytingar á liði sínu, eða eins og Arnar segir að hrista upp í hlutunum.

„Við þurfum að hrista okkur saman og hrista upp í hlutunum. Við verðum að vera með meiri árásargirni og áræðni í því sem við gerum, ég held það gefi auga leið. Það er risa leikur á þriðjudaginn og við þurfum núna að fara að setja saman alvöru frammistöðu.“

Hefurðu einhverjar áhyggjur af þessum frammistöðum liðsins?

„Jájá, þetta starf er þannig að þú hefur alltaf áhyggjur... já ég hef áhyggjur af þessari frammistöðu.“