Veitir ekki við­töl að sinni

Heiða Björg Hilmisdóttir borgarstjóri galt afhroð í prófkjöri Samfylkingarinnar fyrir sveitarstjórnarkosningar í vor. Heiða sóttist eftir oddvitasætinu, líkt og Pétur Marteinsson, og hlaut 1424 atkvæði gegn 3063 atkvæðum Péturs.

Slökkt á símanum

Stærðfræðingurinn Einar Steingrímsson tók saman hversu mörg atkvæði hver frambjóðandi fékk í hvaða sæti. Þar sést að Heiða fékk einungis fimmtán fleiri atkvæði í fyrsta og annað sætið en Steinunn Gyðu- og Guðjónsdóttir, sem hlaut þriðja sætið. Steinunn kemur ný inn á lista flokksins.

Slökkt hefur verið á farsíma borgarstjóra í dag og segir Róbert Marshall, aðstoðarmaður hennar, að hún muni ekki veita nein viðtöl að svo stöddu. Hægt verði að reyna aftur á morgun. 

Óvíst hvað gerist

Engar upplýsingar hafa fengist um hvort hún þiggi annað sætið á listanum. Hún hefur drjúgan tíma til að ákveða sig en uppstillingarnefnd þarf að skila af sér listanum 28. febrúar, eftir rúman mánuð.

Taki Heiða ekki sæti á listanum færast þau fjögur sem lentu í sætum þrjú til sex upp um eitt sæti. Óvíst er þó hver muni skipa sjötta sætið. Guðmundur Ingi Þóroddsson endaði sjöundi í prófkjörinu en samkvæmt reglum Samfylkingar þyrfti kona að skipa sjötta sætið þar sem ekki má halla á hlut kvenna. Það yrði þá Dóra Björt Guðjónsdóttir sem fengi sætið. Komi til þess að Heiða taki ekki sætið mun uppstillingarnefnd fara yfir lögin og úrskurða hver fái sjötta sætið.