„Það trompast allt þarna“

Ýmir segir sérstaklega gaman að spila vörn þegar menn eru svo samstilltir. Hann og Elvar Örn Jónsson fengu sérstakt hrós eftir leikinn þar sem þeir voru hreinlega óstöðvandi á kafla í miðju varnar Íslands.

„Algjörlega. Það er frábært og gott að finna fyrir því að þetta gangi vel. Svo er maður með frábæra menn í kringum sig sem hjálpast allir að. Þetta er mjög gott,“ segir Ýmir.

Besti varnarkafli Íslands kom þegar liðið var manni færra, eftir tveggja mínútna brottvísun Ómars Inga Magnússonar í byrjun síðari hálfleiks. Íslendingar voru ósáttir við refsingu Ómars, stúkan reis öll á fætur og við það leystist einhver stórkostleg orka úr læðingi.

Sturlaðir stuðningsmenn

Íslenska vörnin, spilandi með fimm leikmenn gegn sjö Pólverjum, fékk ekki á sig mark þrátt fyrir liðsmuninn og refsaði hinu megin.

„Þetta kemur bara frá stúkunni, frá okkar stuðningsmönnum. Það trompast allt þarna. Það á fyllilega rétt á sér, þau lesa leikinn vel og hjálpa okkur þarna. Þegar maður fær þennan stuðning þá brýst eitthvað út hjá okkur. Við snúum þessu við, eigum frábærar tíu mínútur og klárum leikinn,“ segir Ýmir um kaflann.

En hvað er hægt að taka út úr þessum tveimur fyrstu leikjum við Ítali og Pólverja?

„Við sjáum það að þegar við yfirvegaðir sóknarlega og spilum okkar leik, þá gengur það upp og betur en það. Varnarlega þurfum við að halda í þennan þéttleika og fá markverðina með okkur. Það hefur gengið vel hingað til. Svo þurfum við að hlaupa á þessi lið, sem við getum gert meira af,“ segir Ýmir.

Stærri áskorun

Næst á dagsrká eru Ungverjar sem hafa líkt og Ísland unnið sigra á Ítalíu og Póllandi. Það er því erfiðara verkefni sem bíður á morgun.

„Bæði lið eru með fjögur stig og þetta er fyrsti leikur í milliriðli. Við viljum taka með okkur tvö stig inn í milliriðil, það segir sig sjálft. Þetta er vel mannað lið, sem hefur verið lengi saman. Með bæði hávaxna og þunga leikmenn en líka snögga, litla og létta. Það er bara mismunandi hver er inni á hverju sinni. Þetta verður áskorun og við erum spenntir fyrir því,“

Situr tapið fyrir Ungverjum í sömu höll fyrir þremur árum enn í mönnum?

„Það má vel vera. En persónulega, nei. Það er bara búið og það er bara leikur á morgun. Það er það eina sem skiptir máli. Það eru tvö stig þar,“

Fínt að sleppa við Banhidi

Það munar þá um fyrir varnarmenn Íslands að þurfa ekki að takast á við línumannsskrímslið Bence Banhidi sem er meiddur. En Ungverjar eiga þrátt fyrir það Adrian Sipos sem er 198 sentímetrar og yfir 100 kílógrömm af vöðva á línunni.

„Banhidi er frábær leikmaður og línumaður, sérstaklega sóknarlega. En þeir eru með annan sem er eiginlega alveg eins. Svo vorum við að glíma við svipaðan leikmann hjá Pólverjunum í gær, þó þeir leiti ekki eins mikið til línumannsins. En þeir vissulega hafa þyngd þarna,“ segir Ýmir.

Hver er lykillinn að sigri?

„Með góðum varnarleik hjá okkur, að hlaupa á þá og refsa þeim.“