Snorri eftir stór­sigur: „Í þessari stemningu og höll þarf ég ekki að segja mikið“

Íslenska karlalandsliðið í handbolta vann öruggan átta marka sigur er liðið mætti Pólverjum í 2. umferð riðlakeppninnar á EM í handbolta í dag. Sigurinn kemur íslensku strákunum í kjörstöðu til að vinna riðilinn.

Íslensku strákarnir áttu í töluverðum erfiðleikum með Pólverja á báðum endum vallarins framan af leik en eftir því sem leið á leikinn, sér í lagi seinni hálfleik, sýndu okkar menn mátt sinn og megin.

Snorri Steinn, landsliðsþjálfari, segir að um erfiða fæðingu hafi verið að ræða, margt gott hafi verið við leik íslenska liðsins en líka hlutir sem hægt sé að framkvæma betur.

„Við fáum svo ótrúlega byrjun á seinni hálfleik og í raun tvær mínútur sem Ómar sem kveikir í öllu húsinu og við einhvern veginn fylgjum með.

Hvað sagðirðu við strákana í hálfleik?

„Í þessari stemningu og þessari höll þarf ég ekki að segja mikið. Þetta snerist meira um að fara yfir taktíska hluti, líka bara að róa okkur. Mér fannst við alveg vera á pari, auðvitað hefðum við geta spilað aðeins betur og erum sammála um það. Það eru móment þarna sem við hefðum geta leyst betur. Við þurftum bara að halda í okkar, halda í þolinmæðina og þá myndi þetta koma. En að það hafi tekið svona stuttan tíma var ég ekki alveg sannfærður um.“

Skynjarðu meiri anda í liðinu en oft áður?

„Það getur vel verið. Ég hef alltaf skynjað anda í liðinu en þú vinnur leiki og þegar við erum að spila á heimavelli með ótrúlega stuðningsmenn og sturlaða stemningu, þá eðlilega hrífast menn með og ganga á lagið. Ég get alveg tekið undir að það hefur verið góð holning á okkur, ég held okkur líði alveg ágætlega vel með það sem við erum að gera. En þeir sem þekkja aðeins til í íþróttum vita að þetta er fljótt að breytast í báðar áttir. Við þurfum að halda okkur á jörðinni, slaka á en auðvitað að njóta líka. Fara svo að einbeita okkur að næsta leik.

Eftir að hafa átt erfitt uppdráttar gegn Ítalíu í fyrstu umferð átti Haukur Þrastarson frábæra innkomu í leik íslenska landsliðsins í kvöld. 

Það hlýtur að kæta landsliðsþjálfarann?

„Engin spurning. Bæði innkoman hjá honum og Viggó af bekknum er frábært að fá og mikilvægt fyrir okkur í vonandi löngu móti. Ég hef aldrei efast um Hauk, fyrir fram var leikurinn gegn Ítalíu leikur sem myndi kannski ekki henta honum og ég hugsaði hann meira fyrir þennan leik. Það er mjög gott að hann sé kominn í gang og hafi átt góðan leik.“

Framundan er lokaleikur riðilsins gegn Ungverjum þar sem gefst færi á að tryggja toppsætið og fara með stig inn í milliriðla.

„Við sögðum það fyrir mót að við vildum vinna riðilinn. Það er klárlega möguleiki og mikilvægt upp á framhaldið að gera. Verkefnið er ljóst, það verður erfitt og við verðum að gera vel, ef ekki betur til þess að vinna Ungverjana á þriðjudaginn.“