Ó­trú­leg endur­koma Stólanna í Kósóvó

Tindastólsmenn urðu fyrir áfalli fyrir leik kvöldsins þegar serbneskum leikmanni liðsins, Ivan Gavrilovic, var meinuð innganga í Kósóvó við vegabréfaeftirlit í landinu. Ástæðan mun vera pólitísk en köldu hefur andað milli ríkjanna eftir að Kósóvó lýsti yfir sjálfstæði árið 2008.

Það munar um minna en Gavrilovic hefur skorað tæplega 18 stig að meðaltali í leik fyrir Stólana í vetur.

Heimamenn byrjuðu leik kvöldsins betur og sérstaklega áttu Tindastólsmenn erfitt með Bandaríkjamanninn Adrio Bailey. Sá skoraði 14 af 23 stigum Pristhina í leikhlutanum og staðan 23-16 að honum loknum.

Lið Pristhina virtist ætla að gera út um leikinn í öðrum leikhluta er það byrjaði hann á 10-2 kafla. Stólarnir svöruðu fyrir sig, skoruðu 17 gegn átta stigum eftir þá slöku byrjun og munurinn sex stig í hálfleik, 41-35 fyrir Kósóvóana.

Enn voru Kósóvóarnir með frumkvæðið og leiddu 71-59 fyrir fjórða og síðasta leikhlutann gegn Stólum sem gekk bölvanlega að hitta körfuna – með hittni upp á rúm 30 prósent í fyrstu þremur leikhlutunum.

Það breyttist í fjórða leikhlutanum. Heimamenn voru með 13 stiga forystu, 80-67, þegar Stólarnir hrukku heldur betur í gang, röðuðu niður þriggja stiga skotum og skyndilega eftir eina slíka frá Davids Geks, var staðan 84-83 fyrir Tindastól þegar tvær mínútur voru eftir. Á þeim kafla skoraði Tindastóll því 17 stig gegn aðeins þremur heimamanna.

Við tóku æsispennandi lokamínútur. Pristhina jafnaði leikinn 87-87 þegar 8,8 sekúndur voru eftir og Arnar Guðjónsson tók leikhlé. Dedrick Basile réðist á körfuna en skot hans varið.

Því þurfti að framlengja leikinn. 

Þar var Tindastóll skrefi á undan í jöfnum leik. Heimamenn klikkuðu á vítaskoti í stöðunni 99-97 þegar 24 sekúndur voru eftir, tóku frákastið en Geks gerði frábærlega að stela boltanum fyrir Stólana. Hann sótti brot, fór á vítalínuna og skoraði úr báðum, staðan 101-97.

Heimamenn reyndu hvað þeir gátu á lokakaflanum en ljóst að Stólarnir færu heim með stigin í farteskinu. Lokatölur 104-98 eftir magnaða endurkomu.

Dedrick Basile skoraði 27 stig fyrir Stólana í kvöld, Adomas Drungilas var með 21 stig og Taiwo Badmus með 18 stig og 13 fráköst.

Stólarnir hafa því unnið fimm af sex leikjum í keppninni hingað til og standa vel að vígi fyrir framhaldið.

Næsti leikur liðsins er við Dinamo Zagreb frá Króatíu á Króknum þann 20. janúar næst komandi.