Jordan lagði NASCAR

Tilkynnt var um sáttina þegar réttarhöldin höfðu þegar staðið yfir í átta daga um miðjan desember.

„Þetta er góður dagur í dag,“ sagði Jordan um sáttina en hann var viðstaddur réttarhöldin frá upphafi.

Með sáttinni féllst NASCAR á að gera svonefnd sérleyfi, sem veita liðum þátttöku í öllum kappökstrum mótaraðarinnar, varanleg. Málaferlin hófust þegar lið Jordans var eitt tveggja sem neitaði að skrifa undir endurnýjun á sérleyfi sínu í fyrra. Liðin urðu þá af hlutdeild í tekjum mótaraðarinnar.

Neitaði að lúta í grasið fyrir eigendunum

Líkt og flestar aðrar liðsíþróttir í Bandaríkunum er NASCAR lokuð deild þar sem lið eiga fast sæti í gegnum sérleyfi sem þau eiga. NASCAR kom því fyrirkomulagi á árið 2016 en margir liðseigendur hafa síðan verið ósáttir við að sérleyfin væru ekki varanleg og að eigendur mótaraðarinnar gætu afturkallað þau.

Samningaviðræður báru engan árangur. Þegar mótaröðin setti liðunum afarkosti um að skrifa undir endurnýjun sérleyfanna í september í fyrra neitaði lið Jordans að gera það og stefndi NASCAR fyrir einokunartilburði.

Við réttarhöldin kom fram að þó að fulltrúar hinna liðanna þrettán hefðu skrifað undir endurnýjun sérleyfanna þá hefðu þeir gert það „með byssu við höfuðið“ þar sem eigendur NASCAR hefðu annars getað svipt þá sérleyfinu og þar með lifibrauði sínu.

Goðsögn í sportinu kölluð „sveitalubbi“

Jordan sagðist í framburði sínum dómi talið sig hafa styrk til að taka slaginn við NASCAR þar sem hann væri nýkominn inn í seríuna árið 2021.

AP-fréttastofan segir að lögmenn NASCAR hafi átt erfitt uppdráttar í réttarhöldunum. Á níunda degi réttarhaldanna náðu deiluaðilarnir saman. Dómur í málinu hefði getað haft afdrifaríkar afleiðingar fyrir mótaröðina og eigendur hennar.

„Þetta eru tímamót sem tryggja að grundvöllur NASCAR er sterkari, framtíðin er bjartari og möguleikarnir eru meiri,“ sagði í sameiginlegri yfirlýsingu NASCAR og liðanna tveggja sem höfðuðu málið.

Málaferlin opinberuðu alls kyns óþægilegar beinagrindur í skápum beggja aðila. Þannig kom í ljós að Steve Phelps, framkvæmdastjóri NASCAR, hefði kallað Richard Childress, einn þekktasta liðseiganda mótaraðarinnar, „sveitalubba“ (e. redneck) og öðrum illum nöfnum. Childress þessi átti meðal annars bílinn sem Dale Earnhardt, ein helsta goðsögn íþróttarinnar, keyrði þegar hann lést í Dayona-kappakstrinum árið 2001.