Að­laga lána­mál ríkisins að breyttum að­stæðum

Fjármála- og efnahagsráðuneytið hefur gefið út stefnu í lánamálum ríkisins fyrir árin 2026–2030. Stefnan lýsir fyrirkomulagi lánsfjármögnunar ríkissjóðs á tímabilinu og setur fram markmið og viðmið um framkvæmd lánamála.

Í tilkynningu á vef stjórnarráðsins segir að stefna í lánamálum marki umgjörð fyrir ákvarðanir um lántökur ríkissjóðs og skuldastýringu. Meginmarkmið hennar sé að tryggja að lánsfjárþörf og fjárhagslegum skuldbindingum ríkissjóðs sé mætt með lágmarkskostnaði, með tilliti til varfærinnar áhættustefnu.

Í stefnunni er fjallað um markmið og viðmið í lánastýringu, núverandi samsetningu lánasafns ríkissjóðs og helstu áhættuþætti. Þá er einnig lýst skipulagi lánamála og upplýsingagjöf til markaðsaðila og fjárfesta.

Stefnan byggist að hluta á fyrri stefnu en felur jafnframt í sér nokkrar breytingar sem miða að því að styrkja skuldastýringu ríkisins og auka fyrirsjáanleika í lánsfjármögnun.

Áhersla á jafnvægi í lánamálum ríkisins

„Með þessari uppfærðu stefnu er verið að aðlaga lánamál ríkisins að breyttum aðstæðum á fjármálamörkuðum og tryggja að ríkið sé áfram í sterkri stöðu þegar kemur að fjármögnun. Áhersla er lögð á jafnvægi, varfærni og skýra upplýsingagjöf, sem skiptir máli bæði fyrir almenning og markaðsaðila,“ er haft eftir Daða Má Kristóferssyni, fjármála- og efnahagsráðherra, í tilkynningu.

Þar kemur einnig fram að í nýrri stefnu séu gerðar breytingar á samsetningu lánasafns ríkissjóðs. Sett eru fram ný viðmið um skiptingu lána, þar sem gert er ráð fyrir að óverðtryggð lán nemi um 45 prósentum af lánasafni, verðtryggð lán um 40 prósentum og lán í erlendri mynt um 15 prósentum. Með þessu eru fyrri viðmið endurskoðuð og lögð áhersla á breytta samsetningu skulda ríkissjóðs á tímabilinu.

Þá eru í stefnunni einnig sett fram uppfærð viðmið um útgáfu ríkisbréfa. Lögð er áhersla á skýra verðmyndun með bæði verðtryggða og óverðtryggða flokka ríkisbréfa. Endanleg stærð útgáfuflokka skal að jafnaði vera að lágmarki 50 milljarðar króna til allra tímalengda. Meðallánstími skulda ríkissjóðs er óbreyttur, eða fimm til sjö ár.

Þá er stefnt að því að hlutfall skulda sem falla á gjalddaga á næstu 24 mánuðum verði innan við fjórðungur af heildarskuldum ríkissjóðs. Í stefnunni er jafnframt gert ráð fyrir árlegri útgáfu skuldabréfa á alþjóðamörkuðum.Í stefnunni kemur fram að ofangreind viðmið í skuldastýringu gildi ekki um sjálfbæra fjármögnun ríkissjóðs.

Stefna í lánamálum byggist á gildandi fjármálaáætlun og er gefin út árlega. Hún er sett fram til fimm ára í senn.