Ísrael viður­kennir sjálf­stæði Sómalílands fyrst allra landa

Samkvæmt umfjöllun breska ríkisútvarpsins hyggst Ísrael þegar í stað auka samvinnu á sviðum landbúnaðar, heilbrigðismála og tækni. Abdirahman Mohamed Abdullahi forseti Sómalílands sagði þetta sögulega stund.

Viðurkenningin hefur verið fordæmd af utanríkisráðherrum Sómalíu, Egyptalands, Tyrklands og Djíbútí sem lýstu sameiginlegri vanþóknun sinni á henni í yfirlýsingu. 

Ráðherrarnir ítrekuðu stuðning sinn við fullveldi og landhelgi Sómalíu og vöruðu við einhliða skrefum sem gætu verið til þess fallin að grafa undan stöðugleika á svæðinu og koma upp „hliðstæðum einingum“ við stjórnvöld í Mógadísjú. Þeir sögðu viðurkenninguna setja hættulegt fordæmi.

Abdullahi forseti sagði Sómalíland staðráðið í að auka samstarf og stuðla að stöðugleika í Mið-Austurlöndum og Afríku. Þetta væri mikilvægt skref í þá áttina. 

Gideon Saar utanríkisráðherra Ísraels sagði sömuleiðis í yfirlýsingu að opnuð yrðu gagnkvæm sendiráð og sendiherrar yrðu skipaðir á næstunni.

„Ég hef gefið ráðuneyti mínu fyrirmæli um að ganga tafarlaust til verka til að festa í sessi tengsl milli landanna tveggja á fjölmörgum sviðum,“ sagði Saar utanríkisráðherra á samfélagsmiðlum.

Sómalíland leit dagsins ljós árið 1991 eftir að hafa gripið til vopna gegn þáverandi einráði í Sómalíu, Siad Barre, og hefur verið einangrað á alþjóðavísu siðan þá. Í Sómalílandi búa tæplega sex milljónir. Landið hefur sinn eigin gjaldmiðil, gefur út vegabréf í eigin nafni og heldur uppi lögreglu og annarri borgaraþjónustu. Það hefur sömuleiðis hernaðarlega mikilvæga staðsetningu við Adenflóa.