Sakaður um svindl á HM í pílu­kasti

Suljovic og Cullen mættust í Alexandra Palace í dag þar sem að Suljovic fór með 3-1 sigur af hólmi og tryggði sér þar með sæti í næstu umferð en Cullen er úr leik í baráttunni um heimsmeistaratitilinn. 

Eftir viðureign þeirra lét Cullen í ljós óánægju sína með spilamennsku Suljovic og sakaði hann um svindl með því að hafa vísvitandi hægt á leiknum með því að taka sér sinn tíma til þess að kasta pílunum þremur í hverri umferð og reyna þannig að hafa áhrif á þann takt sem Cullen hafi reynt að halda milli kastumferða hjá sér.

„Ef þetta er pílukast þá vil ég ekki taka þátt í þessu,“ sagði Cullen í færslu á samfélagsmiðlinum X.

Segir Cullen að í þessu kristallist kannski munurinn á þeim kynslóðum sem eru ríkjandi í pílukast heiminum þessi misserin. 

„Gamli skólinn mun kannski segja að þetta sé hluti af leiknum, þið getið orðað þetta eins og þið viljið. Þetta er bara svindl. Þetta er allavegana ekki pílukast.“

Sjálfur gefur Suljovic lítið fyrir ásakanir Cullen. Aldrei reyni hann vísvitandi að hægja á leiknum og reyna þar með að ögra andstæðingi sínum. 

„Þetta er bara minn leikstíll,“ sagði Suljovic sem bætti við að hann elskaði Cullen.

PDC pílukastsambandið sem stendur fyrir heimsmeistaramótinu er ekki með ákveðna reglu sem snýr að hraða leiksins. En það að vísvitandi reyna að hægja á leiknum til þess að koma andstæðingnum úr jafnvægi er talin vera óíþróttamannsleg hegðun í augum sambandsins og gæti verið á skjön við aðrar reglur í regluverki þess.

En ekkert bendir þó til þess að það hafi verið raunin í þessu tilfelli og engar fregnir borist af því að PDC muni taka ásakanir Cullen á samfélagsmiðlum í garð Suljovic fyrir.