Gott sé að draga úr notkun einka­bílsins í dag og næstu daga

Gert er ráð fyrir svipuðu veðri næstu daga og því líkur á að styrkur svifryks verði áfram hár og þjóðvegir í þéttbýli og helstu stofngötur verða því rykbundnar í nótt til að draga úr uppþyrlun. Rykbinding er samvinnuverkefni Reykjavíkurborgar og Vegagerðarinnar.

Í tilkynningu borgarinnar eru þau sem eru viðkvæm fyrir í öndunarfærum, aldraðir og börn hvött til að forðast útivist í lengri tíma og takmarka áreynslu í nágrenni stórra umferðargatna.

Nota vistvænar samgöngur

Þá er almenningur hvattur, í dag og næstu daga, til þess að draga úr notkun einkabílsins ef unnt er, geyma ferðir sem ekki eru aðkallandi, nýta sér frekar almenningssamgöngur, sameinast í bíla eða nota aðra vistvæna samgöngumáta. Skorað er á fyrirtæki að hvetja starfsfólk til að vinna fjarvinnu sé þess kostur og draga úr akstri ef hægt er.

Í tilkynningu kemur fram að klukkan 10:00 hafi klukkustundargildi svifryks við Grensásveg verið 186,3 míkrógrömm á rúmmetra og 80,3 míkrógrömm á rúmmetra klukkan 12. 

Svifryksgildi hafa einnig verið há í mælistöð í Dalsmára í Kópavogi og var hæsta tíu mínútna gildið 153,9 míkrógrömm á rúmmetra klukkan 11:40. Styrkur köfnunarefnisdíoxíðs hefur einnig verið hækkaður í sömu mælistöðvum samkvæmt tilkynningunni.

Fylgjast náið með

Heilbrigðiseftirlit Reykjavíkur fylgist náið með loftgæðum borgarinnar og sendir frá sér viðvaranir og leiðbeiningar ef ástæða þykir til. Hægt er að fylgjast með styrk svifryks og annarra mengandi efna á loftgæði.is. Þar má sjá kort yfir mælistaði í Reykjavík og annars staðar á landinu.

Svifryk er fínasta gerð rykagna sem eiga greiða leið í öndunarfærin en heilsuverndarmörk miðast við 50 míkrógrömm á rúmmetra á sólarhring fyrir PM 10 (svifagnir um 10 míkrógrömm að stærð). Helsti uppruni svifryks er uppspænt malbik, sót aðallega frá dísilbruna, jarðvegsagnir, salt, aska og fleira.