Pétur Freyr ráðinn fram­kvæmda­stjóri Í­þöku fast­eigna

Þetta kemur fram í tilkynningu. Þar segir aðhann muni taka við starfinu af Gunnari Val Gíslasyni sem hafi tilkynnt stjórn félagsins að hann hyggist láta af störfum sem framkvæmdastjóri félagsins í árslok 2025. Pétur Freyr tekur við starfinu í byrjun árs 2026.

„Gunnar Valur mun áfram gegna starfi framkvæmdastjóra móðurfélagsins, Íþöku ehf.

Pétur Freyr er vel kunnugur félaginu en hann hefur verið viðskiptastjóri Íþöku fasteigna ehf. frá 1. mars 2023, sat í stjórn félagsins frá 9. apríl 2021 til 30. mars 2023 og sem varastjórnarmaður frá 1. apríl 2023. Pétur Freyr stundaði háskólanám í Bandaríkjunum og er með BS gráðu í viðskiptafræði og viðbót í markaðsfræðum frá Costal Carolina & Nicholls State University,“ segir í tilkynningunni. 

„Með komu Péturs Freys heldur þróun félagsins áfram með áherslu á ábyrgan rekstur, styrkingu eignasafnsins og langtímasamstarf við leigutaka. Pétur Freyr er með skýra framtíðarsýn sem fellur vel að stefnu stjórnar um stöðugan og sjálfbæran vöxt,“ er haft eftir Birni Inga Victorssyni, stjórnarformanni Íþöku fasteigna ehf. „Um leið þakkar stjórn félagsins Gunnari Val Gíslasyni fyrir farsæl og öflug störf sem framkvæmdastjóri. Framlag hans hefur lagt traustan grunn að stöðu Íþöku fasteigna ehf. í dag. Við óskum honum velfarnaðar og hlökkum til áframhaldandi samstarfs á öðrum vettvangi,“ segir Björn Ingi.

Þá segir Pétur Freyr að það séu forréttindi að taka við stjórnartaumunum hjá Íþöku fasteignum ehf. eftir að hafa notið leiðsagnar Gunnar Vals í nánu samstarfi okkar síðustu þrjú ár. „Hans framlag til samstæðunnar spannar rúm 20 ár og það er mikill styrkur fyrir félagið að njóta reynslu hans áfram.

Undirstöður félagsins eru sterkar og telur eignasafn Íþöku samstæðunnar rúmlega 100.000fm af nýlegu og vönduðu húsnæði. Við munum halda áfram að byggja ofan á þennan grunn og horfa til nýrra tækifæra til að efla reksturinn og þjónustu við okkar viðskiptavini enn frekar.

Við finnum fyrir vaxandi kröfum markaðarins um fyrsta flokks starfsumhverfi og munum mæta þeim af miklum metnaði.“