„Fær að vera aðalgellan í liðinu“

Þoranna skoraði meðal annars tuttugu stig og tók ellefu fráköst í leiknum framlengda gegn Grindavík og var atkvæðamest í Valsliðinu. „Aðalgellan“ eins og stelpurnar í Körfuboltakvöldi orðuðu það og sögðu Val hafa krækt í afar góðan bita í sumar með því að fá þennan fjölhæfa Keflvíking.

„Valur þarf fleiri svona leikmenn sem taka af skarið, þora að keyra á körfuna og taka pláss. Spila vörn. Hún er alls staðar. Hún er í sókn, hún er í vörn, á bekknum að hvetja, skemmtileg inni í klefa. Þetta er leikmaður sem þú vilt hafa í liðinu þínu,“ sagði Embla Kristínardóttir í Körfuboltakvöldi.

„Það var talað um þegar hún kom aftur að hún væri eiginlega bara varnarmaður. Væri ekki skorari. Hún er svo sannarlega búin að troða sokk upp í þá sem trúðu því,“ sagði Ólöf Helga Pálsdóttir, þáttastjórnandi.

„Mér finnst það samt bara kjaftæði. Hún var ekkert „bara“ varnarmaður,“ sagði Ingibjörg Jakobsdóttir og Embla tók við boltanum:

„Málið er að hún kemur úr Keflavík þar sem þú ert með þrjátíu skorara og fæstir nenna að spila vörn þar. Augljóslega tekur hún þá að sér varnarhlutverk þar. Úti [í bandaríska háskólakörfuboltanum] lærði hún að taka pláss og fá að vera með í sókninni en hún hefur alltaf getað drævað og er alltaf snögg á fyrsta skrefi. Þetta er því ekkert nýtt. En núna fær hún plássið til að blómstra.“

Umræðuna í heild má sjá hér að ofan.