Sjald­gæf 30-20-10 þrenna í Síkinu í gær

Sutton var með þrennu í leiknum og enga venjulega þrefalda tvennu. Sutton náði yfir 30, 20 og 10 í leiknum því hún var með 31 stig, 20 fráköst og 10 stoðsendingar.

Aðeins þrjár aðrar hafa náð 30-20-10 þrefaldri tvennu í sögu kvennadeildarinnar. Hinar eru Kristen McCarthy, Jerica Watson og Helena Sverrisdóttir en sú síðastnefnda er eina íslenska körfuboltakonan sem hefur náð þessu.

McCarthy náði þessu með Snæfelli í sigurleik á móti Keflavík í mars 2015 þar sem hún var með 40 stig, 25 fráköst og 10 stoðsendingar.

Watson náði þessu með Grindavík í sigurleik á móti Keflavík í nóvember 2005 þar sem hún var með 32 stig, 28 fráköst og 10 stoðsendingar.

Helena náði þessu með Haukum í sigurleik á móti Hamri í mars 2016 þar sem hún var með 30 stig, 20 fráköst og 15 stoðsendingar.

Sutton var að ná sinni annarri þreföldu tvennu á þessari leiktíð því hún var einnig með þrennu í leik á móti Val (26 stig, 12 fráköst, 11 stoðsendingar). Grindvíkingurinn Abby Beeman er síðan eini annar leikmaður Bónusdeildar kvenna sem hefur náð þrefaldri tvennu í deildinni í vetur.

Aðeins einn leikmaður hefur náð þessu í karladeildinni en það var Bandaríkjamaðurinn Sandy Anderson í leik með Þór Akureyri á móti Snæfelli í febrúar 1995 þegar hann var með 35 stig, 22 fráköst og 12 stoðsendingar.