Segir „Arnaldarvísitöluna“ lága í samanburði við margt annað

Jón Þór Stefánsson skrifar 1. nóvember 2025 20:00

Arnaldur Indriðason og Starri Reynisson.

Nýjasta bók glæpasagnakonungsins Arnaldar Indriðasonar kostar 8.699 krónur í verslunum Pennans Eymundsson, tvö hundruð krónum meira en skáldsaga hans sem kom út í fyrra. Bóksali segist finna fyrir áhyggjum neytenda af hækkandi verði bóka, en segir raunina þá að bókaverð hafi hækkað lítillega í samanburði við margt annað.

„Fyrir okkur sem pælum mikið í því hvað bækur kosta er ágætt að hafa þennan fasta árlega viðmiðunarpunkt. Vísitala bókaverðs, reiknuð árlega. Arnaldarvísitalan,“ segir Starri Reynisson, bóksali, í aðsendri grein á Vísi þar sem hann gerir bókaverð að umfjöllunarefni sínu.

Þar bendir hann á að sala á nýjustu skáldsögu Arnaldar, Tál, hafi hafist í dag, fyrsta nóvember, líkt og síðustu tæplega þrjátíu ár. Líkt og áður segir kostar nýja bókin 8.699 krónur, en sú sem hann gaf út í fyrra, Ferðalok, kostaði 8.499 krónur.

„Fólki er einmitt tíðrætt við mig um verð á bókum, og hváir gjarnan yfir því hvað bækur séu orðnar dýrar. Ég skil vel að það sé upplifun fólks þegar það horfir á verðmiðann, enda er Arnaldarvísitalan núna að hækka um 200 kr. milli ára og ekki verður það skárra ef við horfum lengra aftur í tímann. Árið 2005, fyrir 20 árum, sendi Arnaldur frá sér bókina Vetrarborgin, en leiðbeinandi verðið sem var gefið upp í Bókatíðindum það ár var 4.690 kr. fyrir þann titil. Þar er því um rúma 4.000 króna hækkun að ræða, upp í verð dagsins í dag.“

Starri segir að þrátt fyrir hækkandi verðmiða sé raunvirði nýrrar bókar ekki endilega hærra en fyrir tuttugu árum.

„Sérstaklega ekki í óðaverðbólgu örhagkerfis íslensku krónunnar,“ segir hann.

„Ef maður slær til dæmis verðið á Ferðalokum, bók Arnaldar frá því í fyrra, inn í verðlagsreiknivél Hagstofunnar fær maður það út að samkvæmt almennri verðlagsþróun ætti Tál, bókin hans í ár, að kosta rúmlega 8.800 kr. Ef við miðum svo við verðið á Vetrarborginni fyrir 20 árum ætti bók ársins í ár að kosta 12.400 kr. Það er því morgunljóst að bækur hafa, miðað við flest annað sem fólk kaupir, lækkað umtalsvert að raunvirði á síðustu tveim áratugum.“

Starri biðlar því til fólks að láta ekki verðmiðann hræða sig í jólabókaflóðinu.

„Það skiptir máli fyrir framtíð íslenskrar tungu að fólk kaupi bækur, gefi bækur og lesi bækur, hefur trúlega aldrei verið mikilvægara. Það hefur líka aldrei verið ódýrara, að minnsta kosti að raunvirði.“

Neytendur Menning Bókmenntir Jól Bókaútgáfa