Krist­mundur verður lög­reglu­stjóri á Austur­landi

Þetta kemur fram í tilkynningu frá dómsmálaráðuneytinu, en ekki hefur verið skipað í embættið síðan Margrét María Sigurðardóttir, fyrrverandi lögreglustjóri á Austurlandi, var skipuð í embætti framkvæmdastjóra nýrrar Mannréttindastofnunar Íslands sem tók til starfa þann 1. maí. Páley Borgþórsdóttir, lögreglustjóri á Norðurlandi eystra, hefur hins vegar tímabundið verið settur lögreglustjóri í umdæminu síðann.

Í tilkynningu ráðuneytisins segir að Kristmundur, sem er menntaður lögreglumaður og lögfræðingur, hafi starfað innan lögreglunnar í tæp átján ár. 

„Kristmundur Stefán hefur síðan í febrúar 2025 starfað sem aðalvarðstjóri og samhliða því aðstoðarsaksóknari við embætti lögreglustjórans á höfuðborgarsvæðinu. Kristmundur hefur í starfi sínu sem aðalvarðstjóri hjá embætti lögreglustjórans á höfuðborgarsvæðinu borið ábyrgð á að stýra 35 manna deild. Hann hefur átt frumkvæði að og stýrt fjölmörgum umbótaverkefnum hjá embætti lögreglustjórans á höfuðborgarsvæðinu.

Kristmundur hóf störf hjá lögreglunni árið 2007 og lauk námi við Lögregluskóla ríkisins árið 2009. Árið 2018 lauk hann meistaraprófi í lögfræði frá lagadeild Háskóla Íslands,“ segir meðal annars um bakgrunn Kristmundar í tilkynningunni. 

Þá hafi hann starfað sem lögreglumaður á nokkrum stöðum á landsbyggðinni, það er á Blönduósi, Selfossi og á Þórshöfn og starfaði við almenna löggæslu á höfuðborgarsvæðinu frá 2010 til 2017. Síðan hefur hann meðal annars gegnt hlutverki staðgengils varðstjóra, verið aðstoðarsaksóknari, sem teymisstjóri á ákærusviði og aðalvarðstjóri hjá lrh. Þá hefur hann sinnt afleysingarstörfum fyrir embætti lögreglustjóranna á Vestfjörðum og á Austfjörðum.