Nokkrum sagt upp eftir afkomuviðvörun Sýnar

„Við sendum frá okkur afkomuviðvörun í gær þar sem kemur fram að áætluð rekstarafkoma í lok árs verður önnur en gert var ráð fyrir. Helsta skýringin á þessu er að það er ákveðin hliðrun á tekjum, það er sem sagt seinkum á tekjum af heildrænum viðskiptum vegna inngöngutilboða meðal annars. Svo er áskriftasalan undir væntingum og auglýsingasalan líka,“ segir Herdís Dröfn Fjelsted, forstjóri Sýnar.

Í afkomuviðvörunni segir að áætlaður rekstrarhagnaður hafi verið á bilinu 800 til 1000 milljónir en áætlaður hagnaður er nú um 280 milljónir króna. Vegna þessa hefur nokkrum starfsmönnum verið sagt upp en ekki var um hópuppsögn að ræða.

„Við gerum nokkrar breytingar á stjórnskipulagi í dag. Það eru nokkrir starfsmenn sem verða fyrir þessum breytingum í dag. Það sem við gerum líka er að við endurráðum ekki í nokkrar stöður,“ segir hún.

„Við erum að hagræða.“

Tekjumódel fyrirtækisins verður endurskoðað en Herdís og starfsmenn Sýnar haldi ótrauðir áfram að vinna í sínum verkefnum. 

Slæm samkeppnisstaða

Herdís segir að nýleg ákvörðun Fjarskiptastofu hafi haft veruleg áhrif á rekstur fyrirtækisins. Sýn hefur staðið í ströngu þar sem þau vildu ekki dreifa Enska boltanum á inn á lokað kerfi Símans. Árið 2019 reyndi Síminn að gera hið sama við Sýn en ekki voru forsendur fyrir því.

„Hún í raun kemur í veg fyrir að við getum aðgreint okkur á markaði. Þetta er mjög sérstök niðurstaða ef maður horfir til þess af því það sem við erum að fara fram á er að fólk geti raunverulega horft á allt sjónvarpsefni sem við framleiðum, kaupum og dreifum í gegnum app,“ segir hún.

Yfir 99 prósent Íslendinga hafi aðgang að Interneti sem sanni að búið sé að svara flutningsréttinum. Þá nefndi hún einnig fjölmiðlafrumvarpið sem var samþykkt á Alþingi í gær. Vegna þess fær Sýn lægri styrk frá ríkinu fyrir fjölmiðlun.

„Svo vil ég líka nefna aðgerðarleysi stjórnvalda gagnvart einkareknum fjölmiðlum á Íslandi. Það hefur mikið verið talað um þetta en lítið gert. Það kom nýlega fram skýrsla frá Viðskiptaráði hvað þetta varðar. Það er annars vegar staða RÚV á markaði sem nýtur bæði opinberra framlaga og auglýsingatekna og er þar með með um níu milljarða í veltu í samkeppni við okkur. Á meðan þurfum við að treysta á auglýsingatekjur. Þetta er ofboðslega skökk staða og hefur verið til margra ára en ekkert hefur verið gert.“

Að lokum nefnir hún mikla samkeppni frá erlendum miðlum líkt og streymisveitum og samskiptamiðlum sem hafi haft áhrif á rekstur fyrirtækisins.

„Þetta hefur áhrif á samkeppnisstöðu einkarekinna fjölmiðla.“