Bæta meðgönguvernd við hefð­bundna sjúk­dóma­tryggingu

Sjóvá kynnti sambærilega tryggingu í sumar, á kvenréttindadeginum, en trygging þeirra kostar 30 þúsund krónur. Hjá Sjóvá eru bætur eingreiðslur og geta numið allt að einni og hálfri milljón. Þar er hægt að kaupa trygginguna allt frá því að þungun hefur verið staðfest og þar til móðir er gengin 32 vikur.

Í tilkynningu frá Verði kemur fram að með því að bæta þessari tryggingu við sjúkdómatryggingu vilji Vörður leiðrétta misræmi á tryggingamarkaði gagnvart mæðrum og verðandi foreldrum.

Þar kemur einnig fram að nýja verndin felur annars vegar í sér fjárhagslegan stuðning ef alvarleg atvik koma upp á meðgöngu eða í fæðingu og hins vegar rétt til bóta vegna meðfædds  heilsufarsástands barns og aðgang að samtalsmeðferð í ef upp koma erfiðleikar.

Nánar er fjallað um hvað er tryggt og bætt á vef Varðar en þar kemur til dæmis fram að meðgöngueitrun, utanlegsfóstur sem krefst aðgerðar, alvarleg morgunógleði og alvarleg spangarrifa er tryggð. Þá tekur tryggingin einnig til tiltekinna læknisfræðilegra atvika í tengslum við heilsufarsástand barns eins og ef það fæðist til dæmis með CP-heilalömun, vatnshöfuð, klofinn hrygg, litningafrávik eða meðfæddan hjartagalla. Þá bætir tryggingin einnig meðgöngu- og fæðingarþunglyndi, bráðakeisara, fjölburaþungun þegar börnin eru fleiri en tvö og mjög ótímabæra fæðingu, það er fyrir 32. viku. Þetta eru aðeins dæmi, það eru fleiri tilvik sem eru tryggð.

Í tilkynningu segir að tryggingin hafi verið þróuð með aðstoð sérfræðinga og að hún taki mið af erlendri fyrirmynd. Þá kemur einnig fram að ákall hafi verið meðal viðskiptavina að meðganga og fæðing ætti að vera hluti af hefðbundnum tryggingum.

Vernd fyrir þolendur ofbeldis

Þá segir að þessi breyting á vernd hjá Verði sé liður í vegferð fyrirtækisins í að þróa tryggingar sem betur eigi að endurspegla raunverulegar þarfir fólks. Sem dæmi hafi þau kynnt í vor neyðaraðstoð fyrir þolendur ofbeldis sem hluta af heimilistryggingum félagsins. Sú trygging var sú fyrsta sinnar tegundar á Íslandi en samkvæmt henni geta þolendur ofbeldis í nánum samböndum geta fengið fjárhagslegar bætur til að breyta frekar aðstæðum sínum.  

„Við hjá Verði viljum að verðandi foreldrar geti gengið inn í meðgöngutímabilið án þess að þurfa að velta fyrir sér hvort þau séu tryggð. Þess vegna er meðgöngu- og foreldravernd nú sjálfkrafa hluti af hefðbundnum sjúkdómatryggingum.  Verndin nær frá upphafi meðgöngu, í fæðingu og eftir að barnið er fætt. Í samtölum okkar við konur kom skýrt fram að þörfin fyrir tryggingu á þessum tímamótum er mikil og við vildum svara því kalli, enda þetta tímabil þýðingamikill hluti af lífi þeirra sem stefna á barneignir,“ segir Guðbjörg Heiða Guðmundsdóttir, forstjóri Varðar trygginga, í tilkynningunni. Hún segir þetta aðeins fyrsta skrefið af mörgum hjá fyrirtækinu til að tryggja að fleiri njóti verndar.

Guðbjörg Heiða var til viðtals í Bítinu á Bylgjunni í morgun um þessa nýju vernd. Hægt er að hlusta á viðtalið að ofan.