Sér fram á margar klukku­stundir í full­kominni ó­vissu

Margrét Kristín Blöndal, tónlistar- og baráttukona, var ásamt allri áhöfn skipsins Samviskunnar, handtekin af ísraelska sjóhernum klukkan hálf fimm að staðartíma í nótt en líkt og komið hefur fram í fréttum er skipið hluti af Frelsisflotanum svokallaða en fólkið um borð í flotanum hefur það markmið að rjúfa herkví og koma hjálpargögnum inn í Gasa. Salvör Gullbrá Þórarinsdóttir, dóttir Möggu Stínu, frétti af handtökunni eldsnemma í morgun þegar móðursystir hennar hringdi í hana.

„Hún hefur bara verið að fylgjast með því það sést í beinu streymi þegar ísraelski herinn umkringir skipið og fer um borð og svo eru skipuleggjendur frelsisflotans í miklu sambandi við okkur og láta okkur vita af öllu sem gerist en við fjölskyldan höfðum verið á nálum því við vissum að þau væru að fara inn á svæði þar sem Ísraelar myndu hugsanlega leyfa sér að taka þau höndum.“

„Þetta er auðvitað bara sjokk“

Salvör var spurð hvernig væri innan brjósts vitandi af móður sinni í haldi Ísraela.

„Þetta er auðvitað bara sjokk. Þetta er skrítið vegna þess að maður trúir þessu varla, þó við vissum að þetta gæti gerst þá á maður svo erfitt með að skilja þennan veruleika. Maður á erfitt með að sjá að fólk þetta koma fyrir fólk með neyðaraðstoð um borð í skipi, læknar og blaðamenn. Ég hef getað átt myndsamtöl við mömmu og alls konar og þetta er svo fullkomlega friðsamlegur leiðangur. Þetta er fólk sem á þá ósk heitasta að koma neyðaraðstoð til fólks sem er svelt og sært á Gasa þá er svo ótrúlega súrrealískt að ímynda sér að þeim sé rænt á rúmsjó, jafnvel þó maður vissi að það gæti gerst, ég er ennþá að átta mig á því.“

Veit ekki hvar móðir sín er

„Við höfum algjörlega misst samband við hana og alla á skipinu. Við höldum samt að það geti tekið þónokkra klukkutíma því þau voru það langt úti á sjó, ef verið er að flytja þau í fangelsi í Ísrael gætu liðið fjölmargir klukkutímar þar til við heyrum eitthvað vegna þess að sendiráðin og fulltrúar ríkjanna munu líklegast ekki heyra neitt þar til þau eru komin í fangelsið, þetta e algjör óvissa eins og er.“