Partey lýsti sig sak­lausan af á­kærum um nauðgun

Partey hefur verið ákærður fyrir fimm nauðganir og eitt kynferðisbrot sem áttu að hafa átt sér stað árin 2021 og 2022. Brotin beindust gegn þremur konum.

Á þessum árum var þessi 32 ára gamli leikmaður á mála hjá Arsenal og reglulega að spila í ensku úrvalsdeildinni.

Partey var ákærður fjórum dögum eftir að hann yfirgaf Arsenal í sumar, þegar samningur hans við félagið rann út í lok júní. Hann gekk svo í raðir Villarreal á Spáni.

Eftir að hafa lýst sig saklausan í dag var Partey látinn laus gegn tryggingu fram að réttarhöldunum sem eiga að hefjast 2. nóvember á næsta ári, samkvæmt frétt BBC. Fram að þeim er honum frjálst að spila fótbolta en honum er þó skylt að láta lögreglu vita af öllum ferðalögum á milli landa með sólarhrings fyrirvara, auk þess sem hann má ekki hafa samband við hina meintu þolendur.

Partey kom inn á sem varamaður á 78. mínútu gegn Tottenham í gærkvöld, í 1-0 tapi Villarreal.