Kynlífsmyndband í Ás­mundar­sal

Grín sem þróaðist

„Þetta er fyrsta almennilega samstarfsverkefnið okkar. Þegar okkur var boðið að setja upp sýningu saman í Reykjavík vissum við strax að okkur langaði ekki að gera eitthvað tilgerðarlegt. 

Við grínuðumst með að við gætum allt eins bara gefið út kynlífsmyndband og hugmyndin þróaðist þaðan. Sýningin er á sinn eigin hátt einhvers konar kynlífsmyndband frá okkur,“ segir strákarnir kímnir í samtali við blaðamann.

Viðar Logi er fæddur árið 1995 og alinn upp í Dalvík. Hann er sjálflærður íslenskur listamaður búsettur í New York og vinnur þvert á ljósmyndun, vídeó og skúlptúr. Viðar Logi hefur komið víða við í listheiminum, fann með Björk á plötunni Fossora, var valinn á Forbes 30 undir 30 2024 og hefur sýnt verk á stórum söfnum víða um heiminn.

Miles Greenberg er fæddur árið 1997 og ólst upp í Montreal. Hann er gjörningalistamaður og skúlptúristi sem vinnur með líkamann í stórum og skynrænum innsetningum, oft með langvinnum gjörningum. 

Hann hefur sýnt á alþjóðavettvangi, í Louvre í París, Neue Nationalgalerie og Feneyjatvíæringnum og verið gestalistamaður hjá Palais de Tokyo í París og The Watermill Center. Árið 2023 var hann á lista Forbes 30 undir 30 í flokknum listir og menning.

Alltaf elskað Ísland

Hingað til hefur Viðar Logi oft myndað sinn heittelskaða en núna er komið að því að skapa saman. Strákarnir hafa verið saman í að verða fjögur ár og listin spilar veigamikið hlutverk í þeirra lífi.

Þetta er í annað sinn sem Miles sýnir á Íslandi en hann var með rosa myndbandsverk á hátíðinni Sequences fyrir nokkrum árum.

„Þessi verk eru öll gerð í New York en ég er svo glaður að vera kominn aftur til Reykjavíkur. Það er ótrúlega verðmætt að fá að vera með sýningu hérna heima, sérstaklega í Ásmundarsal sem hefur frá upphafi verið einn af mínum uppáhalds sýningarsölum. 

Þegar við lentum í Keflavík leið mér eins og spenntum hundi sem gat ekki hætt að dilla skottinu,“ segir Viðar Logi og Miles tekur undir:

„Mér þykir svo vænt um það að fá tækifæri til þess að sýna listina mína á stað sem hefur gefið mér svona mikið. Ég byrjaði að heimsækja Ísland fyrir ellefu árum síðan þegar ég var ennþá í gaggó í Montreal. 

Íslendingar hafa síðan þá verið stór hluti af mínu lífi. Landslagið, samfélagið og andinn hérna hafa mótað mig bæði sem listamann og einstakling. Ég byrjaði líka ungur að hlusta á tónlist frá Íslandi, skoða myndir og var með þráhyggju yfir tungumálinu ykkar.“

S*x tape opnar í Ásmundarsal næstkomandi laugardag klukkan 18:00.