Yrði fljótt kvíðinn með al­eiguna í Bitcoin

Á mánudag var rætt við Bergþór Másson í Íslandi í dag, þar sem hann rakti aðdragandann að ákvörðun sinni um að selja íbúðina sína, og verja andvirðinu í rafmyntina Bitcoin, og fara á leigumarkað.

Í þættinum sagðist Bergþór stefna á að verða ríkur af því að fjárfesta í rafmyntinni, og að planið væri til langs tíma.

Einn mánuður geti orðið rússíbanareið

Hlutabréfagreinandi segir um gríðarlega áhættu að ræða, sem fólk þurfi að hafa hugfasta þegar fjárfest er í rafmyntum.

„Menn þurfa að vera með góðan maga líka. Ef þú átt 20 milljónir í eigið fé, og sveiflurnar eru svo gríðarlegar í verði Bitcoin, þá ertu fljótur að tapa fjórum, fimm milljónum á nokkrum mánuðum. Einum mánuði þess vegna,“ segir Snorri Jakobsson, hlutabréfagreinandi og eigandi Jakobsson Capital. 

Sveiflur í virði Bitcoin séu meiri en í gengi einstakra verðbréfa almennt. Þá sé ákveðin fífldirfska að setja öll eggin í eina körfu, svo að segja, hvort sem um er að ræða Bitcoin eða aðra fjárfestingu.

„Þú getur grætt mjög mikið á því, en sömuleiðis geturðu tapað mjög miklu. Áhættan er mjög mikil.“

Yrði fljótt ein taugahrúga

Er eitthvað sem segir að þetta sé endilega slæm hugmynd, að gera þetta svona frekar en að eiga fasteign?

„Ég held að maðurinn sé þannig að hann þrái yfirleitt öryggi. Ég held að sálarlega séð sé mjög erfitt að vera með aleiguna undir í Bitcoin. Ég yrði fljótt mjög kvíðinn.“

Snorri segir þrátt fyrir það að fólk verði að muna að fasteignir séu ekki endilega besti fjárfestingarkosturinn.

„Það er sama með fasteignaverð eins og Bitcoin. Íbúðaverð getur alveg eins lækkað eins og það hefur hækkað.“

Það geti til að mynda gerst ef draga taki úr fólksfjölgun hér á landi. Í raun gildi einfalt lögmál um bæði fasteignaverð og virði Bitcoin, sem bæði hafa vaxið á síðustu árum.

„Fæst heldur endalaust áfram.“