Falla frá hluta á­kæru vegna tunnumót­mælanna

Frá þessu var greint í sérstökum frávísunarmálflutningi í Héraðsdómi Reykjavíkur í morgun. Tæp vika er síðan Linda Íris Emilsdóttir verjandi kvennanna lagði fram greinargerð þar sem krafist var frávísunar málsins í heild eða að hluta til.

Samkvæmt upphaflegri ákæru sem fréttastofa hefur undir höndum voru konurnar tvær ákærðar fyrir húsbrot og brot gegn lögum um siglingavernd með því að hafa mánudaginn 4. september 2023 farið í heimildarleysi um borð í skipin, Hval 8 og Hval 9, komið sér þar fyrir í tunnu í mastri skipsins og neitað að yfirgefa skipið þrátt fyrir fyrirmæli lögreglu þar um.

Þá eru þær báðar ákærðar fyrir brot á nítjándu grein lögreglulaga, sem lýtur að skyldu almennings til að hlýða fyrirmælum lögreglu.

Fallið hefur verið frá ákæru á hendur konunum vegna brots gegn 3. mgr. 8. gr laga um siglingavernd, þar sem segir að óheimilt sé án heimildar hafnaryfirvalda, skipstjóra, eiganda skips eða útgerðarfélags að fara um borð í skip, taka sér far með skipi eða gera tilraun til þess að ferðast sem laumufarþegi með skipi í eða úr íslenskri lögsögu.

Í greinargerðinni segir meðal annars að atvikið falli ekki undir gildissvið laga um siglingavernd, hvorki hvalveiðibátarnir sem slíkir né gamla höfnin í Reykjavík, en þar voru skipin staðsett þegar konurnar dvöldu í möstrunum.

Segir ákæruna gallaða

Samkvæmt upplýsingum frá Lindu rökstuddi ákæruvaldið ákvörðunina á þann veg að bátarnir tveir, Hvalur 8 og Hvalur 9, séu ekki nógu stórir til að atvikið falli undir gildissvið laganna. 

„Sakborningar fagna því auðvitað að fallið sé frá því að ákæra fyrir brot gegn lögum um siglingavernd, en það að ákært hafi verið yfir höfuð fyrir brot gegn lögum sem samkvæmt skýru gildissviði þeirra ná hvorki yfir hvalveiðibáta né gömlu höfnina í Reykjavík þar sem bátarnir stóðu, þrátt fyrir að málið hafi verið til rannsóknar hjá lögreglu í nær tvö ár, sýnir óvönduð vinnubrögð, skort á rannsókn lögreglu í málinu og hve gölluð ákæran er. Bætist þetta við mistök lögreglu í málinu, sem hafa því miður verið alltof mörg og alvarleg alveg frá upphafi mótmælanna,“ er haft eftir Lindu Írisi. 

Linda segir ekki liggja fyrir hvenær úrskurðar Héraðsdóms í frávísunarmálinu er að vænta. Aðalmeðferð í málinu er að hennar sögn fyrirhuguð í janúar.