Hafna al­farið um­mælum um ís­lensk gagnaver og peninga­þvætti

Þá sé sterk öryggismenning forsenda þess að hægt sé að reka öfluga gagnaversstarfsemi hér á landi.

„Gagnaver á Íslandi starfa í nánu samstarfi við innlendar og erlendar stofnanir til að koma í veg fyrir misnotkun og taka málefni sem varða netöryggi mjög alvarlega. Samstarf við íslensk lögregluyfirvöld er mjög traust. Tilvik eða einstök atvik þar sem innviðir kunna að vera misnotaðir í glæpsamlegum tilgangi heyra til algjörra undantekninga en í slíkum tilfellum taka við skýrir verkferlar og viðbrögð í samstarfi við yfirvöld,“ segir í yfirlýsingunni.

Þar segir einnig að samtökin hafi fengið staðfest frá lögregluyfirvöldum að það tilfelli sem hafi verið til umræðu í gær tengist ekki námugreftri rafmynta í búnaði í íslensku gagnaveri. Þess í stað tengist það alþjóðlegri glæpastarfsemi sem hafi meðal annars verið hýst á netþjóni leigðum frá íslensku hýsingarfyrirtæki.

Forsvarsmenn þess hafi verið grandalausir um að eitthvað saknæmt væri að eiga sér stað. Að öðru leyti tengist málið Íslandi ekki neitt.

Meðal annars er verið að vísa til viðtals við Guðmund Arnar Sigmundsson, frá CERT-IS, í Reykjavík síðdegis á Bylgjunni í gær.

„Svo virðist sem forstöðumaður CERT-IS hafi stigið inn í umræðuna byggt á misskilningi um málsatvik, eðli þeirrar starfsemi sem rannsóknin beindist að og tengsl hennar við íslensk fyrirtæki og íslenska innviði. Samtökin telja ummæli forstöðumanns CERT-IS um málið í heild sinni óábyrg og byggð á röngum forsendum, meðal annars um raforkuverð á Íslandi og meint auðvelt aðgengi að íslenskum gagnaverum, sem eru í engu samræmi við raunveruleikann hér á landi.

Það er mikill ábyrgðarhluti að fram komi fullyrðingar frá íslensku stjórnvaldi, sem gegnir hlutverki viðbragðsteymis við ógnum, atvikum og áhættu á sviði net- og upplýsingaöryggis, að Ísland sé útsettara og því fýsilegri kostur en önnur lönd fyrir glæpastarfsemi, sérstaklega í ljósi þess að því fer víðs fjarri.“

Í yfirlýsingunni er einnig haft eftir Birni Brynjólfssyni, formanni Samtaka gagnavera, að iðnaðurinn hér á landi hafi ríka hagsmuni af því að tryggja að Ísland sé ábyrgur hýsingarstaður.

„Íslensk gagnaver innan vébanda Samtaka gagnavera búa við ríka öryggismenningu og starfa á alþjóðlegum markaði. Íslenskur gagnaversiðnaður byggir á traustum alþjóðlegum og viðurkenndum öryggis- og gæðastöðlum þar sem daglega er unnið að því að tryggja örugga og ábyrga hýsingu gagna. Viðskiptavinir þurfa að fara í gegnum sérstakt áreiðanleikamat og fylgja skýrum notendareglum sem eiga að koma í veg fyrir alla ólöglega starfsemi. Óskiljanlegt er að gefið hafi verið til kynna að gagnaversiðnaðar í landinu sé með einhverjum hætti fýsilegur kostur fyrir glæpastarfsemi. Við höfnum slíkum fullyrðingum algjörlega. Þar að auki standast fullyrðingar um ódýra orku til handa gagnaverum á Íslandi enga skoðun.“