Gervi­greindar­fyrir­sæta í Vogue vekur ugg

Ágústútgáfa Vogue kom út 16. júlí síðastliðinn og prýddi Hollywood-leikkonan Anne Hathaway forsíðuna. Inni í tímaritinu er hins vegar opna frá fatamerkinu Guess með tveimur tískuljósmyndum sem fljótt á litið virðist nokkuð hefðbundnar og eðlilegar.

Myndarleg ljóshærð kona með fullkomna húð og kolgeitarhvítan tanngarð situr við borð á kaffihúsi í blómasamfestingi á annarri myndinni og á hinni stendur sama kona upp við bláan vegg í svarthvítum röndóttum síðkjól.

En eitthvað var þó bogið við sjálfa fyrirsætuna, hún er eiginlega of fullkomin, dálítið ómannleg, eins og sniðmát fyrir fegurðarstaðal. Í smáa letri auglýsingarinnar þar sem önnur síðan leggst að kilinum stendur að auglýsingaherferðin sé framleidd af „Seraphinne Vallora með gervigreind.“

Ekki er ljóst hvort konan sé algjör gervigreindaruppspuni frá rótum eða byggi á fyrirliggjandi fyrirsætu en inni á Instagram-síðu Seraphinne Vallora má sjá tugi áþekkra gervigreindarmódela. Um Seraphinne Vallora segir að það hanni „gervigreindardrifnar markaðsherferðir og myndbönd“ á ritstjórnarstigi. Herferðir fyrirtækisins hafa einnig birst í Elle og Harper's Bazaar.

Nýr ómögulegur fegurðarstaðall og kallað eftir sniðgöngu

Auglýsingin hefur vakið mikla athygli netverja, einna helst neikvæða, og þó hún hafi ekki verið framleidd af Vogue hefur tískutímaritið fengi mikla gagnrýni fyrir að samþykkja að birta efnið

„Þetta er stríð gegn list, tísku og menningu,“ sagði einn æstur netverji.

„Þetta er klikkað því það er ekki eins og okkur vanti fólk sem er í leit að fyrirsætustörfum,“ sagði annar.

Einn notandi X benti á að ef slíkar gervigreindarfyrirsætur verði normið þá muni hinn nýi fegurðarstaðall verða ófáanlegur því hann byggi á einhverju sem er ekki raunverulegt.

Aðrir hafa þó tekið upp hanskann fyrir Guess og segja myndirnar til marks um hvernig mannkyninu fleyti fram.

„Framtíðin er hér. Tekur minni tíma og er ódýrara að framleiða,“ sagði ánægður netverji.

Fjöldi fólks hefur hvatt til sniðgöngu á bæði Vogue og Guess. Spurning hvort það séu orðin ein eða hvort gjörningurinn hafi áhrif á áskriftir.

Auglýsingarnar frá Guess birtust ellefu mánuðum eftir að gervigreindarfyrirtækið OpenAI og Condé Nast, eigandi Vogue, skrifuðu undir samstarf sem felst í því að ýmsar vörur frá Condé Nast, þar á meðal Vogue, The New Yorker, Condé Nast Traveler, GQ, Architectural Digest, Vanity Fair og Wired, birtast inni í gervigreindartólum OpenAI.