Hiti þjóðar­sálarinnar mældur: „Allt frá hatrinu á Þjóð­hátíðar­lögum til vinstri­umferðar og píku­listar“

Viktoría Blöndal, höfundur og leikstjóri, og Starkaður Pétursson leikari stofnuðu nýverið hlaðvarpið Hitamælinn sem gengur út á að fá fólk til að létta af sér í tíu mínútur um allt það sem angrar það.

„Þetta er eitt stórt og feitt rant af því inni í okkur öllum þá er fólk, hvort sem það segir það eða ekki, alltaf að tuða eitthvað. Við erum manneskjur og við erum að tuða allan daginn og þarna fékk fólk pláss til að tuða,“ segir Viktoría Blöndal.

Þættirnir eru teknir upp í glerhúsi foreldra Starkaðs og fær hver gestur afmarkaðan tíma til að tuða.

„Þetta eru tíu mínútur sem fólk fékk til að ranta og fólk nýtti þær frekar vel. Það var ekki til í neitt hversdagsspjall heldur kom sér beint að efninu,“ segir Viktoría.

Drukkið mikið í mollunni

Þau félagar líta á hlaðvarpið sem eins konar plötu þar sem það kemur gestur í hverju lagi. Þættirnir eru sautján talsins en voru teknir upp í einni beit yfir heilan dag.

„Við tvö vorum með einn þátt og svo voru þetta sextán viðmælendur sem komu til okkar milli tvö og sex yfir einn dag. Það voru flestir með tíu mínútur nema lokalagið á plötunni, síðasti þátturinn, var óvart sautján mínútur. Það var svolítill stígandi í drykkjunni,“ segir hún.

Í ofanálag var óvenju heitur sumardagur í Hafnarfirði daginn sem platan var tekin upp mollan svo þykk „að það var hægt að bíta í hana.“

„Það var drukkið mikið,“ segir Viktoría.

Fjölbreytt flóra gesta kom í glerhúsið.

„Það var eins og við færum með einhverja inngildingarstefnu, við vorum með alls konar lið á öllum aldri,“ segir hún.

Tilgangslausar geirvörtur karla og annað sem pirrar

Tuðið var sömuleiðis af ýmsum gerðum, sumir töluðu mikið um eitthvað eitt sem þeir hötuðu meðan aðrir tíndu til fjölda mála. „Sumir komust í stærri gír en aðrir.“

„Þetta var allt frá hatrinu á Þjóðhátíðarlögum til vinstriumferðar og píkulistar,“ segir Viktoría um skala þess sem fólk hataði. Algóriþminn kom líka við sögu, sjálfseyðingarhvöt mannkynsins og Sálin hans Jóns mín.

Einn gesturinn tuðaði eiginlega yfir sig.

„Það var einn þáttur sem var svo leiðinlegur að við nenntum smá ekki að setja hann inn en við gerðum það samt. Svo voru allir frekar hressir og góðir á því þó þeir væru að tuða,“ segir Viktoría.

„Eitt málið var af hverju karlmenn hefðu geirvörtur, þær væru ekki til neins.“

Von á framhaldi

„En þetta er náttúrulega alls ekki fyrir viðkvæma þetta er svo mikið gjamm. Þetta er eitt gjamm-fest,“ segir Viktoría um Hitamælinn.

Næsta hlaðvarpssería verður tekin upp í ágúst

„Fólk má hafa samband ef því liggur eitthvað á hjarta. Þetta er smá eins og Þjóðarsálin fyrir milljón árum þar sem þú gast hringt inn, en núna geturðu skráð þig til leiks,“ segir hún.

Það er því nóg tuð framundan að sögn Viktoríu.

„Fólk er alltaf að leita sér að einhverju að hlusta og það er nóg til af fokking leiðinlegu fólki sem heldur að það hafi eitthvað áhugavert að segja. En þetta er bara skemmtilegt, ef við þurfum það ekki í heiminn í dag þá veit ég ekki hvað,“ segir Viktoría að lokum.