Taka einn efni­legasta leik­manninn frá Ís­lands­meisturum Hauka

Inga Lea er ein efnilegasta körfuboltakona landsins og lykilmaður í íslenska sextán ára landsliðinu.

Inga Lea er fædd árið 2009 og er sextán ára síðan í apríl. Hún er 185 sentímetra framherji sem tók þátt í 29 leikjum með meistaraflokki Hauka á síðustu leiktíð.

Inga var í hópnum en fékk ekki mikið að spila enda enn mjög ung. Hún spilaði samtals í nítján mínútur í úrslitakeppninni og var með 5 stig og 6 fráköst á þeim.

Inga fylgdi því eftir með flottri frammistöðu með sextán ára landsliðinu á Norðurlandamótinu á dögunum. Hún var valin í úrvalslið mótsins eftir að hafa verið með 15,8 stig, 12,8 fráköst og 4,0 varin skot að meðaltali á leik.

„Inga Lea er á yngsta ári í 12. flokki en samt með töluverða reynslu miðað við aldur. Við hlökkum mikið til að vinna með henni en hún mun koma inn í meistaraflokkshópinn okkar en það bíða frekari verkefni. Við munum tefla fram B liði í 1.deild næsta vetur og þar skapast mikilvægt verkefni fyrir unga leikmenn í félaginu – verkefni sem við sjáum sem brú úr yngri flokkum upp í meistaraflokkinn þannig að það verða næg verkefni fyrir okkar ungu og efnilegu leikmenn á næstu misserum,“ sagði Einar Árni Jóhannsson þjálfari kvennaliðs Njarðvík, á heimasíðu félagsins.