Til­laga Vil­hjálms felld með nánast öllum at­kvæðum

Líkt og Vísir fjallaði um í gær var tillaga Vilhjálms eitt tveggja mála sem tekin voru fyrir á hluthafafundi Íslandsbanka í gær.

Taldi sæti í stjórninni alls ekki henta Stefáni 

„Hluthafafundur í Íslandsbanka hf. haldin þann 30. júní 2025 telur stjórnarmanninn Stefán Sigurðsson með öllu óhæfan til að gæta hagsmuna hluthafa. Framganga hans við að niðurlægja og lítilsvirða hluthafa á aðalfundi í Glitni hf. vorið 2008 bendir eindregið til að störf í stjórn hlutafélags í eigu almennings og lífeyrissjóða hentar umræddum stjórnarmanni alls ekki. Hluthafafundur í Íslandsbanka hf. krefst þess að ferill stjórnarmanna í félaginu sé hafinn yfir allan vafa hvað heilindi varðar,“ sagði í tillögu Vilhjálms.

Í tilkynningu á vef Íslandsbanka segir að tillaga Vilhjálms hafi verið felld og fundarstjóri fundarins sagði í gær að það hefði verið gert með 99,74 prósentum atkvæða. Ekki liggur fyrir hversu margir ríflega þrjátíu þúsund hluthafa bankans nýttu atkvæðisrétt sinn á fundinum.

Tölvubréf sem væri komið með bílpróf

Í fundargögnum sagði að neðangreind úrklippa úr skýrslu Rannsóknarnefndar Alþingis hefði verið birt með tillögunni til skýringar, að beiðni Vilhjálms:

„Titringur virðist hafa verið innan Glitnis fyrir aðalfund bankans 20. febrúar 2008, en þar ætlaði Vilhjálmur Bjarnason að gera athugasemdir við starfslokasamning sem gerður var við Bjarna Ármannsson 2007. Einkum hugðist hann gagnrýna kaup bankans á hlutabréfum í Glitni af Bjarna. Starfsmaður Glitnis skrifar í tölvubréfi: „Hugmyndin er að leggja fram yfirlýsingu á fundinum á morgun sem svarar spurningum Vilhjálms Bjarnasonar. Þetta mun gera Vilhjálmi erfiðara fyrir að stela senunni á fundinum og koma aðalatriðum málsins til fjölmiðla.“ Í öðru tölvubréfi frá sama starfsmanni sama dag segir: „Ég held að við ættum ekki að gefa Vilhjálmi of mikinn tíma á fundinum til þess að undirbúa svör við svarinu. Þannig að mínu mati ætti þetta ekki að koma við upphaf fundarins.“ Tölvubréf frá Stefáni Sigurðssyni til nokkurra stjórnenda og starfsmanna Glitnis 20. febrúar 2008 RNA 8. Bindi bls. 221“