Einn hand­tekinn eftir hópslagsmál

Óskað var eftir aðstoðar lögreglu að „ölhúsi“, eins og því er lýst í dagbók lögreglu, í Reykjavík vegna einstaklings í annarlegu ástandi sem var að angra fólk. Sá er grunaður um brot á lögreglusamþykkt fyrir Reykjavíkurborg en þar sem viðkomandi vat ekki skýrsluhæfur var hann vistaður í fangaklefa.

Lögreglu var einnig tilkynnt um slagsmál í miðborginni, þar sem nokkrir voru sagðir veitast að einum. Þegar lögreglumenn ætluðu að ræða við þann sem hafði sig mest í frammi hóf hann að streitast á móti lögreglumönnum. Viðkomandi var á endanum handtekinn og fluttur á lögreglustöð.

Í Reykjavík bárust lögreglu einnig nokkrar tilkynningar vegna samkvæmishávaða. 

Þá var tilkynnt um umferðarslys þar sem bíl hafði verið ekið á byggingu. Minniháttar slys urðu á ökumanni en sá var vistaður í fangaklefa grunaður um að aka undir áhrifum áfengis.

Lögreglu var tilkynnt um annað umferðarslys þar sem bíl hafði verið ekið út af akbraut með þeim afleiðingum að bíllinn valt. Engin slys urðu á fólki en ökumaður var handtekinn og vistaður í fangaklefa grunaður um að aka undir áhrifum áfengis.