Sonurinn smitaði Aron af handa-, fóta- og munn­sjúk­dómi

Í viðtali við RÚV staðfestir Aron að hann hafi verið fjarri góðu gamni þegar lið hans Veszprém varð meistari eftir það sem hefði átt að vera síðasti leikur Arons á ferlinum.

„Átján mánaða gamall sonur minn smitaði mig sem sagt af handa-, fóta- og munnsjúkdómi,“ segir Aron í viðtali sínu við RÚV. Hann fékk gríðarleg útbrot og blöðrur á bæði hendur og fætur. Svo slæm voru einkennin að hann gat vart gengið í þrjá til fjóra daga.

„Það var því frekar þungt yfir manni þessa daga, en maður getur aðeins farið að brosa að þessu núna,“ bætti Aron við. 

Aron er nú kominn hingað til lands og ætlar sér að búa á Íslandi eftir gríðarlega farsælan feril. Ásamt því að verða Íslandsmeistari með uppeldisfélagi sínu FH þá vann hann titla með Kiel í Þýskalandi, Barcelona á Spáni. Álaborg í Danmörku og að sjálfsögðu Veszprém.