Rigning og hvass­viðri með suður­ströndinni

Á vef Veðurstofunnar segir að einnig fari að blása með suðurströndinni og verða allhvassir vindstrengir, þrettán til átján metrar á sekúndu. Slíkur vindur getur verið varasamur fyrir þau ökutæki sem viðkvæmust eru fyrir vindi.

Annars staðar á landinu er búist við austan fimm til þrettán metrum á sekúndu.

Hlýjast verður væntanlega á norðanverðu landinu og á Vestfjörðum eða kringum 15 stig þegar best lætur, en annars verður hitinn víða á bilinu sjö til fjórtán stig.

„Búast má við rigningu víða um land í nótt, aðfaranótt fimmtudags og ennþá væta allvíða fram eftir degi. Þegar líða fer að fimmtudagskvöldi styttir væntanlega upp. Þar sem rofar til fyrr gæti hiti náð sér á strik, líkur eru á því að það gerist á Austurlandi seinnipartinn á morgun með sunnan golu og 17-18 stiga hita, sem yrði þá líklega hámarkshitinn á landinu þann daginn,“ segir í hugleiðingum veðurfræðings.

Veðurhorfur á landinu næstu daga

Á fimmtudag: Norðvestlæg eða breytileg átt 3-10 m/s. Skýjað að mestu og dálítil væta með köflum, en yfirleitt þurrt um kvöldið. Hiti 7 til 17 stig, svalast norðvestantil.

Á föstudag: Norðaustlæg eða breytileg átt 3-8 og bjartviðri, en skýjað og þurrt að kalla á Norður- og Austurlandi. Hiti frá 6 stigum við norðausturströndina, upp í 18 stig suðvestanlands.

Á laugardag: Austlæg átt 3-8. Skýjað, en úrkomulítið við suðausturströndina, annars skýjað með köflum. Hiti 7 til 15 stig, hlýjast á Vesturlandi.

Á sunnudag: Breytileg átt og væta af og til í flestum landshlutum. Hiti breytist lítið.

Á mánudag: Austlæg átt og rigning um mest allt land. Áfram fremur milt.

Á þriðjudag (lýðveldisdagurinn): Útlit fyrir norðaustanátt með rigningu, einkum um landið norðanvert. Hiti 5 til 14 stig, hlýjast um landið sunnanvert.