„Ég er aldrei sáttur“

Orri var keyptur á met­fé frá FC Kaup­manna­höfn til Real Sociedad í byrjun nýaf­staðins tíma­bils. Hann skrifaði undir sex ára samning, fyrsta árinu nú lokið, 37 leikir fyrir Sociedad á tíma­bili sem var nokkurs konar aðlögunar­tíma­bil.

„Ég við lögðum upp með það bæði ég og félagið. Ég þurfti að vera meðvitaður um að fyrsta árið færi í aðlögun. Það er náttúru­lega bara frábært að vera tvítugur og fá að taka þessa aðlögun á þessum aldri í stað þess að koma þrjátíu ára til félagsins og hafa bara fimm ár til að gera sitt besta.

Það er náttúru­lega bara frábært að geta notað þetta ár, núna er þetta ár búið og þá getur maður farið að ein­beita sér að því að leggja 100% af mörkum í leikjum og vera stór prófíll í þessu liði vonandi. Sýna hvað ég get.“

Ekki nóg að vera í einni bestu deild heims

Draumurinn var alltaf að komast í topp fimm deild í Evrópu. Sá draumur rættist fyrir Orra og nú vill hann meira.

„Auðvitað langar manni að gera sig gildandi í liðinu, vera stór prófíll og einn af stærstu leik­mönnum spænsku deildarinnar. Komast á toppinn í fót­boltanum. Það er eitt­hvað sem ég hef stefnt af síðan að ég var lítill. Mér leið alltaf eins og mark­miðið væri bara að komast í topp fimm deild í Evrópu en nú þegar að maður er búinn að ná því langar manni bara í enn þá meira.“ 

„Það er eitt­hvað við mig. Ég er aldrei sáttur og það er eitt­hvað sem ég hef fundið. Það er ekki nóg að vera bara í topp fimm deild og vera bara eins og hver annar leik­maður þar. Ég vil vera besti leik­maðurinn í liðinu og deildinni. Það eru stór skref sem fylgja því, mikil sam­keppni, heimsklassa leik­menn. Ég þarf bara að æfa eins og vit­leysingur og sýna að ég get verið það.“

Ekki tími fyrir það núna

Á tveimur árum hefur Orri farið frá því að vinna meistara­titla í Dan­mörku yfir í að semja við lið í einni af stærstu deildum Evrópu. Hann spilaði sinn fyrsta A-lands­leik árið 2023 og er nú innan við tveimur árum síðar, fyrir­liði lands­liðsins. 21 árs gamall má hann hins vegar ekki vera að því að staldra við og njóta árangursins.

„Það er eigin­lega ekki tími fyrir það núna. En stundum þegar að hvers­dags­leikinn verður klikkaður gleymir maður því stundum hversu klikkaður hann er. Ég hef reynt að horfa til baka á hlutina eins og í Köben þegar að ég átti þrjá mánuði þar sem að ég skoraði næstum því í hverjum einasta leik. Reyni svona, sér­stak­lega þegar að ég fer í heimsókn til Kaup­manna­hafnar, að taka þetta inn. Hvar ég var staddur, hvernig þetta var. En þegar að maður er að gera þetta á hverjum degi þá gleymir maður því stundum hversu hratt hlutirnir eru að ganga fyrir sig, hvað maður getur verið stoltur af sjálfum sér. Það er auðvitað mikið að horfa til baka á en ég býst við því að ég geri það bara þegar að ég verð orðinn fer­tugur í fyrsta lagi.“