„Ég hef þó aldrei kunnað vel við titilinn fram­kvæmda­stjóri“

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Mennska vekjaraklukkan okkar hún Þórdís, tíu mánaða, sér þessa dagana um að ræsa og það er um sexleytið. Við foreldrarnir reynum þó að skipta með okkur dögunum á fyrstu vaktinni.“

Hvað er það fyrsta sem þú gerir á morgnana?

„Allir morgnar byrja á því að borða stóra skál af tröllahöfrum með kanil á og stórum bolla af pressukaffi. 

Næst er það svo morgunsturta til að stilla sig af áður en hlaupið er af stað í daglegt amstur. Ef vel liggur á mér og tími leyfir þá fer ég í bað. Í framhaldi af því eru stóru stelpurnar okkar, Svandís 11 ára og Ragnheiður 13 ára, kvaddar áður en þær halda af stað inn í sinn dag.“

Á skalanum 0-10 hversu mikill dellu-kall ertu?

„10 af 10. Við notum öll tækifæri til að ferðast og skoða heiminn. Það fer ómældur tími í að skipuleggja og plana þær ferðir svo að allt gangi vel fyrir sig, sérstaklega núna þegar við erum komin með lítinn ferðafélaga. 

Ég bý svo vel að konan mín er flugfreyja, þanng að við getum flogið flest allt okkar mjög ódýrt. 

Við höfum svo verið að nota HomeExchange til að geta ferðast ennþá meira með enn minni tilkostnaði. 

Þetta er ákveðið listform.

Hreyfing spilar svo mjög stóra rullu í mínu lífi. Mér finnst ég aldrei heill né hálfur maður nema ég nái að hreyfa mig flesta daga. Ég hef verið að æfa í CrossFit Reykjavík seinustu tíu ár eða svo og get ekki mælt nægilega mikið með.“

Í hvaða verkefni ertu að vinna helst í þessa dagana?

„Sem framkvæmdastjóri tveggja hugbúnaðarfyrirtækja eru verkefnin fjölbreytt. Það er óhætt að segja að enginn dagur sé eins. Ég hef þó aldrei kunnað vel við titilinn framkvæmdastjóri. Mér finnst hann of formlegur en ég reyni að vera það sem ég þarf að vera hverju sinni.

Hjá Vettvangi og Apparatus er unnið að fjölbreyttum verkefnum með mörgum af stærstu fyrirtækjum landsins en okkar þekktustu samstarfsaðilar eru sjálfsagt Lyfja og Dominos sem hafa unnið til fjöldann allra af verðlaunum fyrir sínar lausnir. Meðal þeirra verkefna sem við erum að þróa í dag eru lausnir fyrir KSÍ, Þjóðhátíð í Vestmannaeyjum og Nespresso, til að nefna fáein.

Utan vinnu og ferðalaga snýst lífið svo auðvitað um fjölskylduna.“

Hvernig skipuleggur þú þig í vinnu?

Ég nota dagatalið gríðarlega mikið við skipulagningu en þegar það kemur að því að vinna úr eigin þankagangi er það einfaldleikinn sem ræður og ég nota notes. 

Excel spilar svo auðvitað stórt hlutverk í daglegum störfum í öllu sem viðkemur rekstri.

Ég myndi samt ekki segja að ástríða mín liggi í Excel skjölunum. Ég er fremur mikill frumkvöðull í hjarta og reyni að taka þátt í verkefnum eins og ég get - og þá sérstaklega snemma í verkefnaferlunum, þegar vörurnar eru í skilgreiningar- og hönnunarfasa. Að hanna og skilgreina skipulag, ferla og flæði lausna áður en forritararnir taka við boltanum.“

Hvenær ferðu að sofa á kvöldin?

„Við reynum að vera skynsöm í þessu og leggjast upp í rúm ekki mikið seinna en klukkan ellefu - oftar en ekki með Veru Illugadóttir í eyrunum.“