Kanna hvort á­stæða sé til að endur­vekja kjör­stað í Fljótum

Þetta var ákveðið á fundi byggðarráðs í gær í kjölfar tillögu Álfhildar Leifsdóttur, sveitarstjórnarfulltrúa Vinstri grænna og óháðra, um hvort að endurvekja ætti kjörstað í Ketilási í Fljótum í næstu þing- og sveitarstjórnarkosningum. Benti Álfhildur á að Fljótin væru jaðarsvæði þar sem veður væru oft válynd og samgöngur geti verið erfiðar, sér í lagi á haustin og veturna.

Breytingartillaga um að ráðist yrði í könnun á þróun kjörstjórnar var hins vegar samþykkt samhljóða og að á meðan sú vinna væri í gangi yrði afgreiðslu tillögu um endurupptöku á kjörstað í Fljótum frestað.

Fækkuðu kjörstöðum úr átta í þrjá

Í upprunalegri tillögu Álfhildar kom fram að sveitarstjórn Skagafjarðar hafi í mars 2023 samþykkt fækkun kjördeilda úr átta í þrjár, þar sem íbúar í sveitarfélaginu gætu kosið á Sauðárkróki, Hofsósi og í Varmahlíð.

„Þó þróunin sé sú á landsvísu að fækka kjördeildum, ætti sérstakt tillit að vera tekið til dreifbýlisins í Skagafirði og þeirra íbúa sem búa fjarri þessum þremur miðlægu kjörstöðum.

Fljótin eru jaðarsvæði þar sem veður eru oft válynd og samgöngur geta verið erfiðar, sérstaklega á haustin og veturna. Í síðustu þingkosningum voru aðstæður með þeim hætti að margir íbúar Fljóta áttu erfitt með að komast á kjörstað vegna óhagstæðra veðurskilyrða. Það undirstrikar mikilvægi þess að kjörstaður sé aðgengilegur í nærumhverfi þeirra sem búa í jaðarsveitum, sérstaklega þegar litið er til þess að kosningar geta nú farið fram á hvaða árstíma sem er,“ sagði Álfhildur.

Segir hún ennfremur að mikilvægt sé fyrir stjórnsýslu á öllum stigum að bregðast við og endurmeta ákvarðanir þegar í ljós komi að þær hafi ekki skilað tilætluðum árangri eða hafi haft neikvæð áhrif. Endurvakning kjörstaðar í Ketilási fæli heldur ekki í sér verulegan kostnað fyrir sveitarfélagið en myndi tryggja aðgengi íbúa Fljóta að lýðræðislegri þátttöku.

Tillaga Álfhildar veki furðu

Tveir sveitarstjórnarfulltrúar meirihlutans, þeir Einar E. Einarsson og Gísli Sigurðsson, lögðu í kjölfarið fram breytingartillögu um að þróun kjörsóknar í sveitarfélaginu yrði könnuð áður ákveðið yrði að endurvekja kjörstaðinn í Ketilási í Fljótum.

Taka þeir fram að tillaga Álfhildar veki furðu þar sem hún hafi sjálf samþykkt í byggðarráði og sveitarstjórn 2023 tillögu um að fækka kjörstöðum í Skagafirði í þrjá og þar með leggja af kjördeildina í Fljótum.

„Rökin fyrir breytingunum voru verulega bættar samgöngur frá því sem áður var, ásamt hagræðingu og einföldun kosningakerfisins en yfirkjörstjórn Norðvesturkjördæmis hafði kallað eftir því í nokkurn tíma að kjörstöðum yrði fækkað í Skagafirði eins og annars staðar í kjördæminu. Rétt er líka að hafa í huga að Landskjörstjórn metur hverju sinni áhrif veðurs á hugsanlega kjörsókn um land allt og sé útlitið slæmt í heildina litið að þeirra mati þá hafa þeir völd til að lengja tíma kjörfundar svo að tryggt sé að allir geti mætt á kjörstað. Það væri hins vegar áhugavert að sjá tölur um kjörsókn í Skagafirði öllum frá því þessi breyting var gerð og sjá hvort hægt sé að draga af þeim tölum ályktanir um áhrif breytinganna á kjörsókn í firðinum öllum.

Lagt er til að sveitarstjóra verði falið að afla upplýsinga um þróun í kjörsókn í Skagafirði yfir síðustu 10 ár og að á meðan sú vinna er í gangi verði afgreiðslu tillögu um endurupptöku á kjörstað í Fljótum frestað,“ sagði í breytingartillögu Einars og Gísla sem samþykkt var samhljóða.