Ætla ekki að láta norska olíu­sjóðinn snið­ganga Ís­rael

Stuðningssamtök Palestínumanna hafa kallað eftir því að norsk stjórnvöld beiti þjóðarsjóðnum til þess að setja þrýsting á Ísraelsmenn vegna hernaðar þeirra á Gasaströndinni. Alþjóðasakamáladómstóllinn lýsti hernám Ísraela á landi Palestínumanna ólöglegt í fyrra.

Þessu hafnar meirihluti fjárlaganefndar norska þingsins sem er nú í árlegri yfirferð sinni yfir störf olíusjóðsins. Hann telur að ekki sé hægt að leggja allsherjarbann við fjárfestingum sjóðsins í ísraelskum fyrirtækjum eða fjölþjóðlegum fyrirtækjum sem selja vörur eða þjónustu á hernumdu svæðunum.

„En ef við erum að tala um ákveðnar vörur, til dæmis fyrir eftirlit, sem eru framleiddar sérstaklega fyrir þarfir ísraelskra landtökumanna er það allt önnur saga,“ segir heimildarmaður Reuters-fréttastofunnar innan nefndarinnar.

Búist er við því að þingmenn greiði atkvæði um mögulega sniðgöngu eftir flokkslínum þegar málið kemur til atkvæðagreiðslu í byrjun júní.

Útiloka þegar ellefu ísraelsk fyrirtæki

Olíusjóðurinn átti hluti í 65 ísraelskum fyrirtækjum að andvirði um tveggja milljarða dollara við lok síðasta árs. Það er 0,1 prósent af heildarfjárfestingum sjóðsins sem er sá umsvifamesti í heimi. Margir líta því til stefnu hans um siðferðislegar fjárfestingar.

Sjóðurinn útilokar nú þegar fjárfestingar í ellefu fyrirtækjum á þeim forsendum að þau taki þátt í hernámi Ísraelsmanna. Síðast bættist ísraeska bensínstöðvakeðjan Paz við þann lista fyrr í þessum mánuði.

Yrði blátt bann lagt við fjárfestingum sjóðsins í fyrirtækjum sem stunda viðskipti á hernumdum svæðum þyrfti hann að selja milljarða dollara eignarhluti í stórum vestrænum fyrirtækjum.