Bað lög­reglu­stjóra að „veita fram­vegis réttar upp­lýsingar“

Úlfar gagnrýndi í viðtalinu að ekki fengjust farþegaupplýsingar frá öllum flugfélögum sem lentu á vellinum og nafngreindi nokkur. 

Í bréfi Hauks sagði að ráðuneytið telji „afar mikilvægt að lögreglustjórinn á Suðurnesjum gæti þess framvegis að veittar verði réttar og nákvæmar upplýsingar á opinberum vettvangi og að þess verði sérstaklega gætt að gefa ekki upp opinberlega viðkvæmar upplýsingar sem kunna að hafa áhrif á löggæsluhagsmuni.“

Í frétt Morgunblaðsins segir að í bréfi ráðuneytisstjórans komi einnig fram að stjórnvöld eigi í viðræðum við ákveðin flugfélög um um að skila farþegalistum sem og við Evrópusambandið um tvíhliða samnings varðandi miðlun PNR-upplýsinga, sem eru farþegalistarnir og að markmiðið sé að skrifa undir samninga árið 2024. Bent er á það í frétt Morgunblaðsins að ekki sé enn búið að skrifa undir slíka samninga og að þau flugfélög sem ekki skili farþegalistum hafi verið töluvert fleiri í síðasta mánuði en ráðuneytisstjórinn haldi fram í bréfi sínu.

Úlfar Lúðvíksson hætti sem lögreglustjóri í síðustu viku eftir að hafa verið kallaður á fund ráðherra og tilkynnt að það ætti að auglýsa stöðuna hans. Honum var boðið að sækja um stöðu lögreglustjórans á Austurlandi án þess að hún yrði auglýst í staðinn. Hann hafnaði því og sagði upp. Gerður var starfslokasamningur við Úlfar.

Frumvarp á þingi

Þorbjörg Sigríður Gunnlaugsdóttir lagði í mars fram frumvarp um farþegaupplýsingar sem á að tryggja að öll flugfélög afhendi farþegalista. Málið er búið í fyrstu umræðu á þingi og er nú til meðferðar hjá allsherjar- og menntamálanefnd. 

Í umsögn lögreglustjórans á Suðurnesjum um frumvarpið kom til dæmis fram að einhver flugfélaganna sem hingað komi hafi borið fyrir sig regluverki Evrópusambandsins um persónuvernd. Það hafi leitt til þess að það skorti farþegaupplýsingar um sjö prósent þeirra farþega sem komi hingað frá öðrum lönd­um inn­an Schengen-svæðis­ins hef­ur skort.