Stór­sigur Stólanna í Víkinni

Leikurinn í Víkinni í dag byrjaði með gríðarlegu fjöri. Tindastóll komst yfir strax á 2. mínútu með marki frá Elísu Bríet Björnsdóttur en Bergþóra Sól Ásmundsdóttir jafnaði aðeins tveimur mínútum síðar með marki eftir hornspyrnu.

Á 16. mínútu kom Makala Woods gestunum síðan í forystu á ný þegar hún skoraði eftir frábæra sendingu frá Birgittu Rún Finnbogadóttur. Staðan í hálfleik 2-1 gestunum í vil.

Í síðari hálfleiknum bættu Stólarnir við tveimur mörkum. Fyrst skoraði Birgitta Rún á 60. mínútu eftir að Woods hafði gert vel og Elísa Bríet skoraði sitt annað mark á 71. mínútu.  Elísa fékk síðan gullið tækifæri til að ná þrennunni en Sigurborg Sveinbjörnsdóttir í marki Víkinga kom í veg fyrir það með góðri vörslu.

Lokatölur í Víkinni 4-1 og Tindastóll skilur þar með Víkinga eftir í fallsæti. Tindastóll er nú með sex stig í 7. sæti en Víkingur í 9. sæti með þrjú stig.